منظر طبيعى

منظر طبيعى كلة صفاء و نقاء وجمال الطبيعة البكر, هل يا ترى من الممكن ان نكون نحن مثل هذا النقاء وطبيعتنا البكر كما كنا من قبل, نحتاج ان نحاول لكى نحسن من منظرنا امام انفسنا على الاقل

لماذا لانتعلم من الاخرين؟

انا دائما اتسائل: لماذا لا نتعلم من الاخرين؟ هل تذكرون الجملة الشهيرة فى فيلم الناصر صلاح الدين عندما قال ريتشارد قلب الا سد: الم تتعلم شىء من العدو بعد. استوقفتنى هذة الكلمة لية احنا مش بنتعلم من اى مكان او شخص متطور و متفوق حتى لو كان عدوا مدام سوف يعود علينا بالنفع؟ اعتقد لاننا لازال نعيش فى مجتمع كل تصرفاتة وارائة ناتجة من افراد فقط وليس من مؤسسات او مجموعات, وبكدة عمرنا ماهانبقى منظمين ولا متقدمين وعارفين كدة و مش بنفذ ولا حتى بنحاول مش عارف ليية, يعنى قدامك السؤال و عارف اجابتة وتختار غلط علشان تستفيد اى نوع من انواع الاستفادة الشخصية التى تصب فى مصلحة ذلك الشخص فقط,ياترى اية الحل لو فكرنا فى الكلام دة هاتلاقية فى جميع مجالات الحياة فى مصر معظمها قرارات فردية وغالبا ماتكون رد فعل يعنى كمان متاخر و مش بيكون ليك السبق. ياناس دة احنا حتى مش بنعرف نكرم رموزنا ولا نظهرهم مش عارف لية, مثلا الكاتب العالمى نجيب محفوظ موقع جوجل اليوم يحتفل بة لوجود احتفالات جوائز نوبل واحنا ولا هنا كبيرنا نعرضلة كام فيلم, والدكتور البرادعى بمجرد اشاعات عن ترشيحة للرئاسة اشاعات رهيبة علية لتشوية السمعة وهو ايضا من اشخصيات العالمية و بردوا حاصل على نوبل, ايية الحل حد يقولى, اللة يرحم سعد باشا لما قال مفيش فايدة فعلا هذا واقع وكل ساعة تؤكد حدوث تلك المقولة,يارب مرة , ننفع فى حاجة تعود علينا بشىء ونتعلم بقى ,ملحوظة صغيرة واكنها تنم عن عقول واعية وتفكيرها سليم: الرئيس اوباما وهو يستلم جائزة نوبل قال فى خطابة انة يعلم انة لايستحق هذة الجائزة لانة لازال فى بداية مشوارة السياسى, شفتة بقى الناس اللى فعلا متقدمة ومش بتخدع نفسها ولا شعوبها, تفتكروا لو حصل هنا كان اية اللى حصل واتقال كان زمنا بنغنى بانجازاتة وارائة و رؤيتة الرائعة وهو لم يكمل العام بعد فى منصبة

شهر ديسمبر

شهر ديسمبر اصبح منذ حوالى ثلاث اعوام من اهم شهور السنة الى نفسى, طبعا غير موضوع ليلة راس السنة و كدة , انما فى 3 ايام اهم ليا وسبحان اللة ورا بعض و بالترتيب, يوم 13 يوم ميلاد والدى و 14 يوم وفاتة رحمة اللة تتخيلوا هذة المصادفة نحتفل بميلادة واليوم التالى بذكرى رحيلة رحمة اللة, ويوم 15 يوم عيد ميلاد زوجتى, بزمتكم فى حد يفرح و يحزن ويفرح تانى مش دة جناان, مش عارف اقول اية غير انة شهر ديسمبر

كل عام و انتم بخير

كل عام و انتم بخير و كل عيد اضحى ووقفة عرفات و حج مبرور وكل حاجة حلوة يارب لكل مصر يارب نكون فى احسن حال وسعادة

لماذا؟

ليية كل اللى حصل دة من الجزائرين؟محديش يقول بعد كدة قومية عربية ولامؤاخذة,انا شفت الموت بعينى,لازم نراجع نفسنا بجد لازم نعرف مين بجد معانا ومين عدونا,كدةةة خلالاص خلصت, انا جالى رسايل منهم بشتيمة كالعادةوتهزيق,بجد ملعون ابو دى عروبة وكلنا عارفين انهم بربر, مش هاتكلم تانى, وتحيا مصر بجد,انا سعيدبتوحد شعب مصر كان مش عندى امل فى بلدنا,بس حقيقى مصر بخير

يارب يامصر

برغم كل اللى بيحصل فى بلدنا بردة بنحبها ويارررررررررررررب انصرنا يوم السبت ونصعد كاس العالم علشان بجد شعبنا يستحق فرحة وسط اللى بيحصلنا كل فترة كلة يقوول, يااااااارب النصر لمصر

رحمك اللة يا دكتور

توفى الى رحمة اللة الدكتور مصطفى محمود, هذا المفكر الرائع, انة احد الشخصيات التى اثرت فى شخصيا و فى جيلى ببرنامجة الجميل العلم و الايمان, خلاف كتبة المثمرة الرائعة, رحمة اللة وعسى ان يعوضنا بمفكرين مميزين مثلة, كانت لة مقولة رائعة كنت قراتها لة وهى صحيحي جداا وهى : قيمة الانسان فى الحياة بما اضافة فيها من ولادتة الى مماتة

حال بلدنا

شوفوا واستمتعوا باحوال بلدنا اللى تضحك و تغيظ فى نفس الوقت, مرسلة اليكم من الحفرة الوحيدة بالعالم من بلدنا

جوانتنامو

طبعا كلنا عارفين هذا المعتقل الامريكى الشهير بكل ما يتمتع بة من طرق تعذيب رهيبة, من يومين سيدة سعودية اكتشفت ان اسمها على موبيل زوجها جوانتنامو, تخيلوا تفتكروا الست دية كانت بتعمل اية فى زوجها ولا هو اللى كان بيفترى عليها بالاسم دة, المهم الست اطلقت من زوجها بسبب الاسم دة , وكويس ان فى حد بيعرف يخرج من المعتقل دة اليومين دووول, عقبالناا يارب

هيئة سكك حديد مصر

طبعا كلنا فاكرين اعلانات هيئة سكك حديد مصر اللى خنقونا بيها فى رمضان علشان التزويغ من التذاكر والتخريب والكلام دة, امس كان هناك قطار يخرج من الاسكندرية الى القاهرة الساعة 9 مساء, وصل القطار الى القاهرة الساعة 6 صباحا يعنى 9 ساعات سفر من هناك الى هنا, ليية بقى فى عربية حصل فيها عطل فارسلوا لها جرار علشان يشدها راح الجرار عطل, راحو ارسلوا جرار تانى بردة عطل, راحو ارسلوا جرار تالت من باب التفائل ان التالتة تابتة راااح اية عطل, اربع جرارات علشان يجروا عربية, هى دية سكك حديد مصر ودية حكومة مصر وهيئاتها, الشىء الجميل ان ركاب القطار اول ما وصلوا عملوا 70 بلاغ ضدد الهيئة يعنى الحمد للة لسة فى امل فى الشعب بس الحكومة اعتقد لا, وسلمولى على الاعلانات للهيئات والوزارات

لقاء حفيد الزعيم عبد الناصر

شاهدت امس بقناة الحياة لقاء بحفيد الزعيم عبد الناصر لذكرى وفاتة, وهذا الحفيد هو ابن المليونير المعروف ورجل المستحيل فعلا لمصر اشرف مروان الذى قتل منذ عامين, طبعا لايوجد خلاف على الزعيم عبد اناصر ولا على اشرف مروان من عظمتهم وخدمتهم لوطنهم ولكن فعلا هذا الرجل احمد مروان ينطبق علية قول هذا الشبل من ذلك الاسد, تخيل بقى انى كمان حفيد عبد الناصر وهو بة تشابة فى ملامح الوجة من الزعيم الراحل, مدى الفخر الذى هو فية لانة حفيدة وقدرتة الرائعة على الكلام والهدوء والرزينة والقوة ايضا تدل انة تربى فى بيئة ناصرية فعلا, ياريت كانت بلدنا فيها حد زية ولا حتى ربعة, حقيقى تحية لة ولابية العظيم اشرف مروان الذى اغتيل من جهات معادية معروفة, والتحية الاكبر لزعيم الامة العربية وكرامتها وعزها ومن اعظم زعماء العالم فى القرن العشريت طبقا لتقرير جريدة واشنطن بوست الامريكية انة من اهم زعماء القرن الماضى فى العالم, اللة يرحمة حقيقى

ليلة وقفة العيد

صور لاخر يوم رمضان ووقفة العيد بالمدينة الساحرة دائما الاسكندرية بغروبها الجميل وليلها الساحر

المسؤولية

كم هو جميل ان تكون مسئول, تختلف حجم المسؤولية عن ما انت مسؤول عنة لكنة احساس رائع ويعطيك القوة والثقة بالنفس وايضا نضج بالعقل والشخصية مهما كانت نوع المسؤولية وحجمها, فهى تكسبك الكثير من الخبرات الحياتية اللازمة ويتفتح عقلك على امور لم تكن تدركها من قبل وتجعلك فى حالة مثيرة من التزود بمعرفتها واكتشافها وكلما تخطو فيها خطوة لكى تعرف الجديد يكون بنفس مقدارها يتم ثقل شخصيتك ونضجها, بالرغم من متاعبها التى لابد ان تصاحبها من اعصاب متوترة وقلق, الا انها جميلة واحساسها رائع ويشعرك بالقوة وبقدرتك على الخوض فى الحياة بخطى ثابتة

رمضااان جانا

كل عام وانتم بخير جميعا وبصحة وسعادة وفى رضا ربنا كلنا نتسابق فى الشهر الكريم

الوحدة الوطنية

كل شوية نلاقى على الفضائيات اقباط المهجر يقولوا ان فى تفرقة و كلام كبير والفضائيات مابتصدق تلاقى اى خناقة ما بين مسلم و مسيحى وتلاقيها شعللت ونداءاات لامريكا وكلام غريب قوى علينا, واللة ياجماعة كل دوول ناس صحبة مصلحة وغالبا بتكون شخصية ليهم, حرام اللى بيحصل دة الناس بداءت تتاثر وتشيل من بعض, بس ارجع واقول اننا بردوا مش قوى كدة ومفيش تفرقة قوى كدة غير للناس اللى بتتلكك وعايزة تعمل مشاكل وكل اللى بيحصل من مشاكل دية من اللى بيشوفوة ولعب فى الدمااغ, يعنى مثلا عندى فى الشركة فى المواسم الاسلامية الخالصة الشركة بتوزع ياميش رمضان وكحك ولحمة العيد وحلاوة المولد النبوى لكلة, مش بتفرق بين دة و دة وهو دة الطبيعى بتاعنا, ارحموناا بقا هى مش ناقصة عايزين نتقدم ابووس ايديكم

انا المديير

الحمد للة واضح ان الجواز وشة حلو عليا وربنا كرمنى وبقيت اناااا المديير, زى فيلم فؤاد المهندس لما كان اسمة السبعاوى طة وبقيييت انا المدير, ربنا يسترها معايا واكون على قدر المسؤولية ادعولى ياجماعة, يااارب

عيد ميلادى

النهاردة عيد ميلادى ال 30 اول عيد ميلاد ليا وانا متجوز بينى وبينكم احساس جميل وجديد بس ربنا يستر فى باقى السنين, انا دخلت فيلم احمد حلمى الجديد وكالعادة عجبنى فكرتة حتى لو مقتبسة, وحكمة الفيلم معناها جميل وهى ان تعيش غائبا حاضرا افضل من ان تكون حاضرا غائبا, وكل سنة و انتم طيبيين

هاتجوووووووووووووز

انا بكتبلكم اخر بوست فى حياة العزوبية قبل جوازى يوم الخميس, وهادخل القفص زى مابيقولو, ارجوكم اللى معاة مفتاح للقفص عايز منة نسخة, قوييينا يارب

برامج واحد من الناس

انا مضطر اخرج من حالة التركيز فى الجواز مع انة مش باقى غير 5 ايام ولكن, انا متابع جيد للبرامج الحوارية و من فترة تابعت برنامج واحد من الناس بغض النظر عن حب الناس للمذيع ولا لا بس اكتشفت ان بلدنا ديية ملياانة بلاوى والناس فيها لاتعرف معنى العيشة الكريمة, انا كل يوم خميس بقيت بدل ما اتفسح فى الوييك اند بقيت اشيل الهم من اللى بشوفة و من التفكير ليية احنا كدة, وياترى بعد كل سنين التدهور فى كل شىء فى بلدنا ممكن تتصلح طبعا مش ,انا بجد بقولها بصوت عالى و انا المفروض داخل حياة جديدة ربنا يستر عليا فيها و يقدرنى عليها,انا اعلنها انا يااااس جدااا من احوال بلدنا وواللة ماهتتعدل, كل مافكر و افتكر تاريخ مصر دايما فى مشاكل اجتماعية وغيرها من ايام الملك وبعد الثورة,وحتى يومنا هذا فى الالفية الجديدة مفيش جديد , برغم كل دة شعبنا مميز جدا سواء اشخاص عالميين او قدرة على العمل, بس بردة نفسى نعيش مرتاحيين, انا بجد كل ما اتفرج لازم ادمع, بس فى نفس الوقت احمد ربنا على اللى انا فية ومش بسببى كل دة بفضل ربنا وابويا وامى,واخاف جداا واقول اكييد فى وقتنا دة مش هاقدر اعمل نص اللى عملوة ليا لى اولادى, ما علينا انا هاسيب الكابة و اروح افرح نفسى اشعر انى عريس, دعوااااتكم

الجواز وسنينة

ازيكم ياجماعة واللة وحشينى جداا, بس مكنتش قادر اكتب اى شىء من الضغوط اللى عليا للتجهيز للجواز ولزومة,حاجة بجد تجيب احباط وتزهق الواحد من الجواز واللى عايز يتجوز.واللى يغيظك بقى كل واحد يعرض عليك المساعدة والكلام دة بس طبعا عزومة مراكبية ماعدا القليل منهم اللى يعتمد عليهم الحقيقة بس بجد الموضوع دة عامل زى بلدنا كلة عايز يفرح وبس من غير اى مشاركة حقيقية كلة على الجاهز, احنا كدة فى مصر نحب غيرنا اللى يتعب واحنا اللى نظهر بعد كدة على الجاهز, انا بجد حاسيس ان الناس فى بلدنا دية كلة بيمصلح على كلة وحاجة صعبة قوى ربنا يسترها بجد علينا, وادعولى ربنا يقوينى واخلص فى ميعادى, بالقى من الزمن 16 يوم تفتكروا الحق؟ يامسهل

دايما صوتنا عالى

انا طبعا مش هاتكلم عن المشكلة اللى حصلت للمنتخب مع عمرو اديب علشان كلة اتكلم عنها واللى اتقال اتقال وكلنا عارفينة. لكن المهم ان احنا كشعب مصر دايما صوتنا عالى عمال على بطال فى الحق والباطل, من الاخر كدة بنهيص مع الهيصة سواء فرحة نفرح اووى ونبقى مفيش حد زينا ولاقدنا والحزن والغضب نبقى فى اسفل سافلين من الحزن والغضب وكلة يطلع يقول اللى مش ممكن يتقال من ناس المفروض انها عاقلة وبتفهم, يا جماعة لازم نبقى موضوعيين بقى دة, وصانا سيدنا محمد (صلى اللة علية وسلم) بان خير الامور الوسط, يعنى كلة بالمعقول سواء فرح او غضب, يارب نفهم بقى ونتعلم علشان نستحق اننا نتقدم ونعرف نتعلم من بعض وعلى الاقل نسمع بعض مش كلة صوت عالى ومحديش بيسمع حد, حراام بقى كفاااية

انت مصرى

لية دايما المصرى يظهر بس فى الاوقات الصعبة وبمزاجة لما يحب يعمل حاجة بيعملها , لية مش يبقى دايما , بس هو دة المصرى اللى يكون عايزة بيعملوة, نفسى نكون دايما جد على طوول فى كل المجالات ونرفع راس مصر بلدنا ونكون احسن ناس, تحية من القلب الى كل المصريين وبلدنا الحبيبة افخر يا مصرى انك من مصر,مبرووك شرفتونا ورفعتوا راسنا عالميا, ويارب تكمل فرحتنا بوصولنا لكاس العالم بقى يارررررب

قاال كاس عالم قاااال

واللة ياجدعان مالناش فيها احنا احسن ناس تتشطرعلى بعضيها و بس و نعاير بعض و نغيظ فى بعض, وساعة الجد كلة بيضيع زى الزبدة لما يطلع عليها النهار تسيح, احنا اجدع ناس تتفرج وتتكلم بس مافييش افعال, نحن قوم اقوال لا افعااال كالعادة, وسلملى على كاس العالم,رااااحتتتت,اشوفكم فى تصفيات 2014 وربنا يدينا ويديكم طولة العمر ويلهمنا الصبر

هل هو رئيس فيلسوف ومفكر؟

فى خطاب الرئيس الامريكى بمصر الذى كان ممتعا ومتفائلا بعالم جديد وليس كالخطابات السياسية المعروفة انة فعلا رئيس مختلف فى وقت نحتاجة عالميا , لفت نظرى كلمة فى خطابة وهى كلمة معناها جميل جدا وهى طبيعية ولكننا لانعمل بها والكلمة هى عامل الاخرين كما تريد ان يعاملوك فعلا لو ركزنا بالكلمة نجد انها لو تم العمل بها لن نرى اى مشاكل فى حياتنا ولابد منالعمل بها وتعميمها لاننا نحتاجها جدااا فى دنيانا المليئة بالصعاب, اخيرا انة رئيس ذو كاريزما رائعة وعقلية رائعة ولكنى اعتقد انة جاء فى وقت صعب على العالم اجمع من ازمات واوبئة, اتمنى ان نتعلم من كلماتة والعمل بها, حقيقة اول رئيس امريكى احبة من اول مرة, انة فعلا مفكرو فيلسوف

الحيرة

ماذا تفعل لو كنت مكانى عندما يكون لك فرصة عمل خارج مصر وانت الابن الوحيد لام واخت وكمان كنت هاتجوز بعد شهر ونص وفجاءة يجيلك عرض للعمل بالخارج فى ظل الظروف المنيلة اللى احنا فيها, وهذة العائلة الصغيرة لا تريدنى ان اسافر وفى نفس الوقت الدنيا هنا مش كويسة و الفرص مش تتكرر للسفر, بينى بينكم مش عارف انا بين نارين انا عارف ان شىء باييخ انك تكون بتجهز نفسك للجواز وداخل فى المووود بيتاعة وفجاءة يجيلك حاجة و كمان برة بلدك يعنى مش عارف الدنيا عاملة اية,

اللى عندة فكرة عن سلطنة عمان يقولى ولو عندة راى يقولوا يمكن يساعدنى, وربنا يعمل اللى فية الخير

الاسكندرية وجمالها

دائما جميلة وساحرة يا اسكندرية , بس مش عارف ليية كل ما اروح هناك النوووم بيكبس عليا اكنى منمتش منشهور, الجو هناك مريح قوى واليوووود وهواا البحر يسطلواا الواحد الحقيقة

الى والدى

فى كثير من الاحيان اشعر باننى اريد لقاء والدى وعايز اكلمة واحكيلة واشكيلة وارمى حمولى علية من وقت وفاتة وانا حاسيس انى خلاص مبقاش ليا ضهر يحمينى وكمان انا المفروض اكون ضهر وحماية والدتى واختى شعور صعب جداا فلعلا نفسى اقعد معاة ولو 5 دقائق,ساعات كتير افكر لو كان ينفع ابعتلة رسالة احكيلة فيها زى رسايل الموبايل واستنى الرد على الرسالة,نفسى اعرف هو عامل اية ومرتاح ومبسوط وياترى كان راضى عنى؟

كلة دة كوووم وليلة امس كوووم تانى, لما حجزت ليوم كتب كتابى كان نفسى اووى يكون معايا ويكون اول واحد اقولوا انى حجزت وافرحة, كان نفسى يكون معايا اوىىى ويكون جنبى فى الوقت دة والتجهيز والامور الاخرى,انا بحبة قوى ونفسى يكون عارف دة , مش عارف لما كان عايش كان حاسيس بكدة ولا لا,بجد اللة يرحمة ويارب يكون مبسوط و مرتاح. اسف انى وجعت دماغكم بس كان نفسى اقول لعالم كلة انة وااحشنى قوى ومش هالاقى اكبر واوسع من النت اقولوا لية, رب ارحم والدى وادخلة جناتك, ااميييييين

عيش التوست وراس السنة

البوست دة بيحكى حاجة حصلت ليا مع اصحابى فى احلى اوقات حياتى واجملها

كان لينا صديق عايز يشترى عيش توست وكان اليوم دة ليلة راس السنة وكنت انا و اصحابى فى المرحلة الثانوية, المهم اليوم دة كان ليلة راس السنة وكنا رايحين نجيب العيش التوست من المعادى علشان كنا ساكنين جنبيها وقولنا ننزل نهيص بالمرة هناك فى راس السنة ونقضى يوم لطيف احتفالا بالسنة الجديدة, وبعدين واحنا ماشين عدينا على المطعم الصينى اللى فى شارع 9 ولقينا بنت زى القمر خارجة من المطعم وطبعا مش مصرية وواضح انها مخانقة مع صاحبها, المهم صديقى العزيز شادى اصر على انة يكلمها ياعم يهديك يرضيك مافيش فايد فصحبنا نادر صاحب العيش التوست قالوا كلمتين علشان يروح يقلهم واحنا وراة متابعين الموقف, وفجاءة واحنا ماشين وانتوا عارفين المعادى تتوة اصلا وساعات بتكون ضلمة لاقينا عربية بكشافات جامدة فى وشنا, ونزل منها واحد وبيقول رايحين فيين قلنالو عادى بنتمشى ولاقينا عسكريين حوالينا,سالنا انتوا مش عارفين انتوا فين قلنا لا

قال هنا مساكن الامريكان وكانت بقى اياميها ايام الارهاب وكدة

قلنالو طيب احنا مالنا

راح بداء يقول بطايئكم والمسدس بداء يظهر

راح سال نادر صاحبى بتاع التوست اياة اسمك اية

قالوا اسم النبى حرصك ونط من فوق العربية و جرى وكلنا طبعا زية

كل واحد جرى فى حتة وسمعنا الظابط بيقول هاتولى الواد بس على نادر صاحبى

قلنا بقى لازم نليهيهم عنة لقينا العساكر بتقلع البيادة( جزمتهم ) ووراة رحنا جرينا قدامهم وافترقنا لغاية لما اتقابلنا بعد ساعات فى شارعنا بسلام بعد مطاردات واللة كنا هانروح فداهية

كل دة بسبب العيش التوست وصاحبى اياة بتاع البنت الامريكانى

وصدق اللى قال الجرى نص الجدعنة وساعات الجدعنة كلها

بس كانت ليلة فعلا احلى احتفال بالسنة الجديدة

يامصرى لية

اغنية رائعة جدا لعلى الحجار وكلامها يدل على حال شعب بلدنا الدائم سوف اكتب كلمتها اليكم واعتقد ان منكم من يعرفها ولكنى شعرت بها تلك الايام القليلة بشدة وهى تقول كالاتى

يامصرى لية دنياك لخابيط والغلب محيط والعنكبوت عشش على الحيط وسرح على الغيط ,يامصرى قوم هش الوطاويط كفياك تبليط,صعبة الحياة والحل بسيط حبة تخطيط

فتحت باب استيرادك وصرفت فوق ضعف ايرادك حيلى للخواجة استكرادك سابك بتقرا فى اورادك ودة قشطك و نزل تشفيط

ومهولاتى تحب تزيط ساعة الفرح زغاريت تنطيط وفى الياتم هات ياصويت وفى المظاهرة تصد تشد ومنين تخاف تنسى التصويت

ولية بترشى وتتساهل وتضيع حقوقك بالساهل تستاهل النار تستاهل,يا غويط ويحسبك الجاهل ساهل وساهى وغبى وعبيط

يامصرى يالى الغلا عصرك والنهب فية عصرك حصدك قوم للحياة واسبق عصرك ولاحاجة حترجع مصرك الا ان تكون شغال ونشيط

يامصرى لية دنياك لخابيط والغلب محيط والعنكبوت عشش على الحيط وسرح على الغيط

مقولتان

هناك مقولتان اعمل بهم فى حياتى لكى اصنع شىء فيها واعتقد انها ناجحة حتى الان وهما, الاولى: كن انت نفسك "اى لابد ان تفعل الاشياء بطريقتك انت وفكرك و عقلك انت ولست بافكار و عقول اخرين لكى تكون مميز ولك مكانة جيدة فى الحياة " , والثانية : انك تعيش كل يوم جديد و كانك تقصد ان تعيشة " اى ان كل يوم يكون لك فية بصمة او عمل وكانك اردت ذلك اليوم لتحقيق ذلك وليس لانة يوم من ايام الحياة التى لك فى الدنيا". اعتقد ان تلك المقولات تساعد الانسان ان يكون مفيد لنفسة ولغيرة فى حياتة اليومية

اعياد الربيع

الدنيا ربيع و الجو بديع بس مش هانقفل على المواضيع

زواج المسيار

اعلنت دار الافتاء المصرية على موافقتها للعمل بزواج المسيار وقد سبقها قبل ذلك دول عديدة و منها السعودية ولكن دار الافتاء اشترطت ان يوافق ولى الامر اى رئيس الجمهورية, يعنىرموا الكرة كعادة الحكومة المصرية فى ملعب الريس, وزواج المسيار هذا عبارة عن ان يتزوج الطرفين و يلزم كل واحد مكانة مع بعض الزيارات كل كام يوم لزوووم الامووور اياهاا, وهناك من يشجع هذا الزواج و هناك من يرفض و كل لة راية واسبابة, انا ارى فى ظل الظروف التى نعيشها فى دنيانا الصعبة انة من الامكان ان يكون هذا الزواج مع الضمانات الكاملة للزوجة وايضا عندما تسمح الظروف يكونوا فى مكان واحد فيما بعد, بس الموضوع لة مشاكل كتير منها المعروف والغير معروف الذى سوف يظهر مع تطبيقة, ربنا يستر قال يعنى هى ناقصة, مارايكم فى هذا الموضوع؟

حفل توقيع كتاب مدونة شيرين الكردى

الى خالى العزيز شيرين الكردى مبرووك دخولك عالم الادب بكتابك لست الا بعض الاوراق ,تمنياتى لك بالنجاح و التوفيق الدائم

مصر و المنتخب

موضوعى عن علاقة التشابة بين بلدنا العظيمة وقدرتها الكبيرة ومنتخبنا القومى, مصر من افضل البلاد فى الموارد الطبيعية و البشرية ولا ينقصها سوى العقل المدبر للنهوض بها مع وجود اخلاص و عدم الانانية ولا حرامية, ولكن طبعا بلدنا مثل اى دولة فى العالم التالت مليانة حرامية وكلة عايز يمصلح و يعملة غلة حلوة يعيش بيها هو و عيلتة ومش مهم الناس, اللة يرحم سعد زغلول قالها كلمة فعلا مفيش فايدة, هناك بعض الاشياء الممتازة لكنها دايما تضيع وسط الاشياء البايظة. اما بالنسبة لمنخبنا فالتشابة فى اننا كنا نملك فرصة للوصول لكاس العالم بقوة ولكن طبعا علشان لاعبيتنا مصريين لازم يطلع عين ابونا فى ويتحرق دمنا ويجلنا ضغط بسبب ناس مش عندها اى احساس و كل واحد يتخانق مع التانى بعد لما شبعوا فلوس و شهرة و بعد المباراة والنتيجة الزفت اللى زيهم راحو ديسكو, واللة العظيم مافيها فايدة هى دى مصر

كلهاا فتوااات

يوجد حاليا بمجتمعنا امر واقع نعيشة جميعا و ملموس ويوجد فى مجالات العمل , وهو انك تجد ان الاعمال قسمت لقطاعات صغيرة وان لكل قطاع مدير ومدير تحتة و مدير فوقة مع ان تلك الاعمال فى الوقت القريب كانت تنجز بعدد قليل من الاشخاص و بنفس الكفاءة و ممكن افضل, فاصبح جميع الافراد مديرين حتى ولو كان مسئؤل عن البوفية وبقيت كلها مديرين, انا لا اقول لا للتخصص و لكن فى مجالات مفيدة اكثر مش عمال على بطال ( نعطى لكل واحد قطعة ) وانتشرت هذة الثقافة للشارع العادى واى حاجة تحصل يقولك على طول انت مش عارف بتكلم ميين؟. و هذا يذكرنى بمقولة شهيرة بفيلم للفنان الراحل الكبير توفيق الدقن ولكن اسف لا اتذكراسم الفيلم عندما قال( البلد كلها بقيت فتواات امال مين اللى هاينضرب ) وربنا يسترها علينا منهم

عيد الام

نحتفل هذة الايام باعياد الأم وجميعنا ندرى معنى الامومة لنا جميعا و ما تعنية تلك الكلمة بجميع معانيها وافعالها, اريد ان ابعث برسالتى هذة علنا الى اعظم انسانة فى حياتى واغلاها فى دنيتى كلها الى امى العزيزة التى اتمنى لها العمر المديد والصحة الجيدة لكى اقوم بارضائها واسعادها ( وكمان علشان اضمن الجنة التى تحت قدمها ) يارب اكون بارا بها واكون دائم تحت رضاها وسند لها فى الدنيا, لا استطيع ان اوفيها حقها فهى السر الخفى للدعاء المستجاب للدعوات التى تدعوها الى ولاختى, ما اغلاكى يا امى. اريدكم ان تشاركونى بمعانى الامومة الجميلة التى لديكم ايضا

ما الفرق بين الحقيقة و الواقع؟

اطرح هذا التساؤل واعلم ان سوف يكون هناك اختلاف فى الاراء للاجابة على هذا التساؤل , اعتقد ان هناك حقائق معلومة لنا جميعا مثل شروق الشمس وغرروبها من شرق وغرب الارض فهذة حقيقة وواقع فى نفس الوقت , وتوجد حقائق معروفة وغير واقعية او لاتكون واقعا ,وهناك واقع يحدث واحيانا لا يكون حقيقيا ولكنة واقع. . اتمنى منكم المشاركة فى توضيح مالفرق بين الحقيقة و والواقع؟

لقطات طبيعية

طيب ووفى زيادة عن اللزوم

اكتب هذة الكلمات و انا كلى حزن و اسى على شخص كنت اعتبرة مقرب الى وصديق من فترة وهى فتاة كانت لى مثل الصديق , مع ان كان هناك الكثير ممن يحزرنى منها ولكنى كنت اقول انا لى بما اراة وهو كل طيب, ولكن مع مرور الوقت اكتشفت انى كنت مخدوع وانى كنت وفى لصديق لا يستحق واعتقد اننى لايوجد خطا على ان اكون هكذا فلابد للاصدقاء من وجود الوفاء و الاخلاص, اعتقد اننى اثق باكثر مما يكون فى الناس ,كل ما اعرفة انى تعلمت الدرس ولكننى اعتقد انى لن اتوقف عن الثقة ولا الحب لاننى ببساطة هذا هو انا, ولا يهمنى ان يكونوا يستحقوا ام لا فانا لا اؤذى احد ولكنهم هم مايفعلون, ومن المؤلم ان تسمعهم يقولوا عنك كذا و كذا , للدرجة دية كنت طيب و اهبل, لاشىء يستحق البكاء علية مدمت انا هو انا والايام سوف تبرهن من هو الافضل فيما بعد,وسلملى على الصحبية و الجدعنة

ربنا يستر علينا

نعيش هذة الايام ازمة مالية عالمية وهى تؤثر على كل شىء بالعالم وبداء تسريح العمال فى بلاد العالم وعملى من الذين تاثروا بتلك الازمة فى مجال السياحة واكيد هناك قطاعات كثيرة وخصوصا الصناعية والخاصة بخطوط الانتاج متاثرة جدا وهناك بيانات كثيرة لا تبشر بالخير فى العالم كلة وليس مصر فقط, اولها ان هناك52 مليون شخص فى العالم سوف يتم تسريحهم من اعمالهم اى اننا فى ازمة حقيقية وسوف تؤثر على البسطاء لدينا و الذين فى الطبقة المتوسطة والاقل فى المستوى تاثيرا كبيرا نرجو من اللة ان يسترها معانا فى الدنيا و الاخرة

الجواز شىء والصحبية شىء

نرى هذة الايام هذة الظاهرة المؤكدة وهى ان الرجل او السيدة المتزوجين يكون ليهم اصحاب من دون علم الاخر, فهو لة صحبيتة سواء متزوجة او لا و يحكى عن حياتة الزوجية والمشاكل ويظهر انة غير سعيد حتى لو هو اصلا سعيدلكى يفضفض معها و يخرجوا و كدة وهى كمان نفس الموضوع كل واحد لية صحبتة و صاحبها وكثيرا من هذة العلاقات الغير صحيحة تؤدى لشىء معروف و هى المعاشرة الجنسية لكى تكون الخيانة كاملة واقول لكم ان هذة العلاقات حاليا موجودة بكثرة جداا نتيجة المشاكل الزوجية المعتادة ولكن فى الوقت الحالى غير زمان كلة بيهرب من مشاكلة وبدل ما يحلها ينحل هو فى العلاقات الخاطئة وفى جميع الحالات الزوجين فى خيانة لبعض و خسارة للكرامة وللدين, هذا هو واقع مجتمعنا المبجل فى هذا الزمن وربنا يستر علينا كلنا

الحقيقة الخفية

موضوعى اليوم عن العلاقات العاطفية عامة بين اى شخصين عندما يكون هناك شخصين متفاهمين و متحابين و يمضى عليهم زمن نلاحظ ان هناك شخص منهم يبحث عن الجديد الذى يجدد نشاطة بة و يشعر انة لازال مرغوبا بة, وهذة الحالة تحدث كثيرا ونتيجتها غالبا تكون عودة الشخص الباحث عن الجديد الى الطرف الاخر و هو مدرك تمام ان الشخص الاساسى هو المفضل لة وهو الاختيار الصحيح وما فات كانت نزوة ومرت. هذة الحالة تشبة الشمس فى السماء عندما يداريها بعض الغيوم ولكن دائما تبقى الشمس و دائما تنقشع الغيوم

غروب الشمس

مطلقة نعم عانس لا

كثير مننا فى الوقت الحالى من يتزوج بدون اسباب عاطفية او حتى عقلية وذلك لمجرد ان العمر تقدم بة ولابد ان يتزوج وهذا هو الحال فى مجتمعنا الان للنوعين الذكر والانثى, عند الذكر فى اسرتة تبداء الضغوط ( والزن ) لكى يسرع بالجواز ومشاهدة اولادة والفرحة بهم بما يجعل كثير من الاشخاص الانسياق وراء تلك الضغوط وتكون غالبا النتيجة غير محمودة لة وتحدث حالات الطلاق وتتشرد الاسرة التى كونها و المصيبة الاكبر اذا وجد الاطفال وذلك لانها بداء حياة بدون ترتيب و تخطيط صحيح وايضا بدون تفاهم وحب فكيف اذا يقوم بانشاء اسرة جديد على اى اساس تقوم تلك الاسرة. وناتىللجانب الاخر الانثى عندما يطرق العرسان بابها وتتامر وتتمنع لكى تختار الانسب وتجد ايضا قطار العمر قد بدا فى الانطلاق فتتقبل اى شخص يكون جاهز وايضا بدون اى عاطفة او تفاهم و مع اول صدام يحدث الانفجار وظهور عدم التفاهم و الانسجام وكالعادة يحدث الطلاق.هناك الان فى مجتمعنا مقولة بين الانسات تتردد كثيرا و هى اكون مطلقة افضل من ان اكون عانس هل تتخيلوا ما وصلنا الية وهذة ليست عبارة اشخاص جهلة انما يقولوها خوفا من العنوسة و لايدركون ماينتظرهم. فكروا فى انفسكم وان الزواج نصيب مهما طال العمر

من انا لاحكم عليك

كثير من البشر يعطى الحق لنفسة لتقييم غيرة و يحكم علية باراء شخصية من نفسة وهذا ما يزيد الصراعات بيننا جميعا لماذا دائما نحب ان نقييم الاخرين و ننسى انفسنا لا احد يستطيع ان يقوم بالحكم على احد وهو بة عيوب و هذا مؤكد لاننا بكل بساطة بشر اعرف ان كلامى قد يكون صحيح او خطاء كل شخص و رؤيتة للموضوع ولكن اذا فكر الانسان ولو لحظات قبل القيام باى حكم و معظمنا يحكم من غير تاكد او معرفة او معاشرة للمواضيع ,انا دائما اقولها لنفسى من اكون انا لاحكم على هذا و ذاك اعتقد من المهم اولا ان نصلح من انفسنا و ننتقدها لاصلاحها ونصبح افضل مما كنا علية