Sunday, December 30, 2012

اصدق شعار للثورة

اصدق مقولة وشعار لثورتنا المجيدة من وجهة نظرى المتواضعة, الله جاب الله خد الله عليه العوض. يدينا و يديييكم طوول العمر ونشوف ثورة تانى, كل ثورة و انتم طيبييييين 

Friday, December 7, 2012

التمويل و التوجية؟!؟

من اول ماوصل لانتخبات الرياسة شفيق و مرسى, عرفت ان البلد دية مش هاتتغير, واحد شغال بفلوس الاخوان و السكر و الزيت والتانى بفلوس رجال الاعمال و النظام السابق.
يبقى ازاى عايز تقتنعوا ان مصر هاتتغير ولسة الناس بتتوجة, لما نبقى بنقرا و نفهم من نفسنا يبقى فى امل,ياترى استفتاء الدستور هايدينا الامل دة ولا كما كنت دائما, هايبان مع انى مش متفائل.لكن الامل مش هايروح عشان مش ينفع يرووح لو راح يبقى روحناااا معاة.يارب احفظ شعبنا و بلدنا الحقيقيين مش شعب الاخوان ولا الفلول ولا شعب المحافظات, نسيوا كلهم ان فى حاجة اسمها شعب مصر

Wednesday, December 5, 2012

مبتعلمش على راى انغاام

واضح ان المصريين مش بيتعلموا ودة واقع شايفينة و حسينة, عشان كدة قلنا علم فى المتبلم يصبح ناسى او التكرار يعلم الحمار اللى اتحولت و بقت الشطار عشان ندارى خيبتنا.
انا مش هاتكلم عن اللى بيحصل عشان مفيش كلام ينفع, لكن فى حاجة عايز الفت النظر ليها, كلة دلوقتى مع او ضد الرئيس و الاعلان و الدستور و الاتحدادية وانا وانت و رقصنى يجدع, طيب محديش واخد بالوا ان الايام بتمر و تقرب من الاستفتاء اللى المفروضمن فترة نعرف الناس عيوبة عشان يقولوا لا, انما دلوقتى مشغولين فى حجات واشتبكات اللى هو نظام شايف العصفورة. وبعدين فجاءة نصحى الصبح نلاقى النهاردة الاستفتاء ومش عارفين نعمل اية وهم منظمين ليهم الناس اللى هاتقول نعم ويصبح الدستور شرعى و من الصندووق زى الريس, مش بقلكم على راى انغاام مبتعلمش

Sunday, December 2, 2012

تعطيش الجييم؟!!؟؟

يسادة يا كراام هاقول حاجة معرفش بتلاحظوها ولا لا, اول ماتسمعوا اى حد فى اى مكان او فضائية وهو بيتكلم بيعطش الجيم فى اى كلمة مش محتاجة تتعطش تعرفوا انو من اخوانااا, شوفوا و اسمعوا ولاحظوهاا كلهم كدة

Thursday, November 29, 2012

سياسة الواد مزيكا!!!

فاكرين مسرحية المتزوجون,لما جورج سيدهم سال نجاح الموجى ( الواد مزيكا ) بتفهم فى السياسة ورد علية قالواا انا الشعب, ولما سالو عن السياسة قالو يابخت من وفق راسين فى الحلال  ورد علية قالوا دى سياسة امك.ههههههههههه, اهى دية بقى تنطبق على سياسة واراء اخوانا اللى انتوا عارفنهم

Monday, November 26, 2012

ايام الامس والنسيان؟!؟

ديما يتقال فين ايام زمان ومفيش زيها كنا بتعيش من غير مشاكل مش زى دلوقتى , الواحد ديما فى مشاكل شغل و حياة وقرف, ولا يوم من ايام زمان كانت روقان ومفيش شيل هم.
وهنا بقى تيجى نعمة النسيان اللى بتخلينا ديما نفتكر الحجات الحلوة بس. مع انة واللة ايام زمان كانت بردوا فيها ايام سودة و منيلة بس انتم لو ركزتم هاتفتكروها وتعرفوا انة لكل وقت فى الحلو والوحش عشان هى دية الدنيا والحياة.
زى دلوقتى يقولك ولا يوم من ايام مبارك انا مش من انصار مرسى لكن عندى عقل وتفكير واقعى,افكركم بردوا انة كانت فى ايام سوودة كتيير قوى بس انتوا افتكروا, الفكرة اننا مش بنتعظ ومش بنفكر غير اللى عايزينة و بس مش نفكر صح ونقييم, واللى احنا فية دة و لسة هانكون فية سنة كمان على الاقل دة لو مش ازييد, تفريغ طبيعى جداا للكتمة اللى كنا فيها. افتكروا ايام الامس بالحلو والوحش وانسوا الاسواء لكن لازم نتعلم ونفهم ونصبر

Thursday, November 22, 2012

الخيال السياسى

زى ماقال ابراهيم عيسى اللى ماسكين البلد معندهمش اى خيال سياسى ولا توقع لاحوال المواطنين. اذا كان كل ذكرى تتعمل يحصل فيها ضحايا زى محمد محمود حاليا, امال فى ذكرى الثورة هايحصل ايية؟؟؟!؟؟
استرها يارب وخلصنا من البلاوى اللى عندنا تعبناااا بجدد

Saturday, November 17, 2012

البقية فى حياتك يا مصر

البقية فى حياتك يا مصر.معرفش اعزيكى فى اطفالك وامواتك اللى ماتوا فى حادثة القطر فى اسيوط وكان من قبليها قطر تانى من فترة دة غير اللى بيموتوا فى الطرق كل يوم. انا مش عارف اعزى اهلك وشعبك ولا اعزى شعبك و اهلك فيكى.معنديش نفس اتكلم ولا اعمل اى شىء البلد حالتها مقرف جدااا محديش فى البلد دية دلوقتى عندة حاجة تفرح حالة من البؤس وانعدام الامل فى اى شىء.
مش لو صرفوا فلوس غلق المواقح الاباحية اللى هاتتكلف مليين ولا خسارة الفلوس من غلق المحلات لو اتصرفوا فى غلق المزلقانات مش افييد ولا انا اتجننت. 5000 جنية للمتوفى احةةةةةة دة الموبيل اى فون الجديد ب 8000 جنية دة احنا بنرخص كل يوم عن اللى قبلة. معنديش كلام تانى ومش عايزاقول تانى عشان مفيش فايدة 

Thursday, November 8, 2012

يوم فى المرور...

اللى عندة عربية لازم كل سنة او كل 3 سنين حسب ترخيص الرخصة يقضيلة يوم فى المرور للتجديد، وانت بقى وحظك ياتكون ربنا موقفلك ولاد الحلال وامورك تمشى وتتسهل دة طبعا غير انك تكون لازم بايت قبلها عشان الزحمة،وفى الحالة دية ممكت تخلص فى حدود من ساعتين لتلاتة وكدة تكون امك دعيالك وربنا راضى عنك، اما بقى لو العكس ربنا يتولاك.
الغريب ان اليوم بتاع المرور غير اى يوم تقضية فى اى مصلحة حكومية خالص هناك اختلاف و فرق شاسع لانة دائما ملىء بالاثارة والتشويق مقدرش اقول كمان متعة, الاثارة والتشويق تتمثل فى اية بقى مخالفاتك مثلا تحس وانت مستنى تعرف عليك كام اكنك مستنى نتيجة الثانوية العامة لاحسن فلوسك مش تقضى و بكدة يكون راح اليوم و مجهودك هدر.
دة غير بقى كلام الناس اللى انت طبعا بتتصاحب عليهم وانت واقف فى الطابور بتتسلوا لغاية لما يتحرك، غير طبعا الفلوس اللى بترشها فى كل شباك عشان تخلص وتنجز, من الاخر بعد لما تخلص ويكون لسة فيك نفس بتحمد ربنا و تكون سعيد طبعا كمان دة لو مش دفعت دم قلبك، بس فكرة المرور ليها مغزى انك بتتقرف و يطلع عين اهلك كلهم عشان حتى لو قالوا عليك اى مبلغ كبير تكون عايز تدفع و تخلص وفى الاخر تتف عليهم وعلى اللى شغلهم وعلى البلد اللى انت فيها. واول ماتروح وتبص للرخصة اكنك خدت شهادة الدكتوراة ولا الايزو تبتسم وترتاح وتحس انك انجزت شىء مهم جداا فى حياتك اهم من نجاحك فى عملك او حياتك عامة. حررام واللة اننا ننشغل بحجات المفروض تكون ميسرة لحياتنا وليس معوقة لها وننشغل عن الاهم. مصر هى امى

Thursday, November 1, 2012

هو مفيش غيرى ولا اية؟!؟؟؟؟

طبعا كلنا عارفين موضوع ان المحلات تقفل الساعة 10 بليل عشان توفير الطاقة وتيجى تستفسر عن اى سبب ان دة مثلا لية يتطبق فى الشتا وع ان مفييش تكييفات زى الصيف ولا الناس سهرانة عشان المدارس والسقعة والدنيا هاتبقى ضلمة كحل اكتر ماهى بتبقى ضلمة فى الشتا وبكدة بندى فرصة عمل للحرامية والبلطجية يشوفوا رزقهم مساواةة بقى من مطالب الثورة والعدالة الاجتماعية, نقول طيب زودوا الفلوس على الاغنياء والمقتدرين والمتفرعنين, يقولك كلة عشان مصر وانت لازم تضحى عشان بلدك عشان نمر من الازمة وانت بقى تنهار وتحس انك راافت الهجان ترووح منفذ,, دلوقتى بقى فى رقم تبعت علية رسالة ب 5 جنية عشان اقتصاد مصر وانتى مصرى و ابويا مصرى ياااخى يلعن ابو مصر على اللى مش عارفين يمشوها ولا يعملوا اى حاجة عدلة هو مفيش غيرى ولا اية. الرحمة يا كفرةةة الناس بتمووت وبتموت بعض عشان جنية. نفسى امشى بعيد واتفرج على مصر  اكنى بشوف فيلم وهايخلص,لكن مع الاسف انى مصرى ومقدرش ابقى غير كدة

Wednesday, October 24, 2012

لية مش مبسوطيين زى زمان؟؟؟؟

ليية مش بقينا ننبسط زى زمان فى المناسباات الجميلة سواء اعياد او رمضان؟ الشعور دة شايفة من فترة مش بعد الثورة و بس وزاد بعدها مع عدم تحسن فى اى شىء. بلدنا تستحق احسسسن بكتيير
المشكلة انها لو اتحسنت هاترجع تانى لنقطة الصفر ويقولوا فى تحسن.نفسى نعدى بقى النقطة دية اللى عليها من سنين طويلة بلدنا تستحق واللة كفاية بقى كلام وشعارات وصراعات زهقنا.كرهتونا فى بلدنا و هى ملهاش زنب.الواحد كل مايوصل للاحساس دة يروح اى مكان من اماكن مصر الجميلة واللى فيها حضارة تخلية يحس بقيمتها و يحزن اكتر بس متاكد ان بلدنا ديما هاتكون موجودة ليوم القيامة.ارجوكم اعملوا عشاان تبقى احسن و كل واحد يعمل اللى عليية من غير اى مصلحة كفاية بقى.يارب نشوفها احسن بلد وناسها احسن من اى حد.وحشتنا اوووى الفرحة اللى بجد

Wednesday, October 10, 2012

فداك ابى وامى....

ايام الرسول (ص) كانت دائما تقال هذة المقولة بصدق وحماس لقربهم منة وغيرتهم على الدين وخلافة. الان تقال لمجرد شعارات وتفقد معناها الراسخ والقوى و الحقيقى لها.ترديدها كثيرا عمال على بطال تفقدها معناها. انا اراهن ان معظم اللى بيقولوها ابوهم وامهاتهم قد توفوا لذلك لا معنى لها , طيب لو هم فعلا غيورين بجد و بحق يقول مثلا فداك نفسى او ابنى او بنتى ولا هو النفس والاولاد اغلى وتحز فيهم اوى من والديهم اللى غالبا توفوا,نفسى بجد نقول اللى جوانا وحاسينة مش مجرد كلام

Tuesday, September 18, 2012

اروح هنا واجى من هنا اضراااااب

استغل مقطع من اغنية احمد عدوية الشهيرة زحمة يا دنيا زحمة ,لكن بدل ماارووح هنا زحمة وااجى من هنا زحمة بقيت ارووح هنا اضرااب و اجى من هنا اضرراب, البلد مشلولة من الاضرابات فى كل القطاعات بمختلف نشاطتها بها اضراربات شكلنا هانعمل قريب يوم الاضراب فى مصر ويعملوة اجازة رسمى, المعلمين اضرااب النقل العاد اضرااب والميكروباصات والسيرفيس اضراااب جامعة القاهرة قافلين الابواب العاملين اللى فيها مانعين الطلبة والدكاترة اضرااب دة غير جامعة النيل و اضرابها اللى بقالة فترة وخدووا علقة تمام, حتى الجامعة الاميريكية هايحصل اضراب من الطلبة عشان المصاريف بعد مازادت السنة اللى فاتت 7% زوودها السنة دية كمان 9% اززاى و لية والفلوس دية بتروح فيين وبعد النقاش قاللو طيب احنا الطلبة القداام ليية يزودوها على الجدااد, يعنى بالصلاة على النبى مصلحتى و بس,الا هو مرسى فييين والمجلس الرئاسى ولا مشغول بالقرض اللى ناخدة ولا لا وهنشيل دعم البنزين ولا لا. بس الاكييد هو بيفكر هايصلى الجمعة اللى جاية فيين؟؟

Monday, July 30, 2012

البلد كلها زبالة

مصر كلها بقت عبارة عن مقلب زبالة كبيير فى كل مكان وعلى كل شكل و لون, الحقيقة ان اهم هدف للثورة تحقق بامتياز وهو السواسية عشان مصر كلها بقت عشوائية فى كل شىء مرور و نضافة وكهربا ومجارى و مياة كلة, مبقاش فى منطقة راقية او شعبية, كلة قرف و زبالة وعشوائى

Tuesday, July 10, 2012

مسلسل لا

من سنة و كام شهر بدات كلمة لا تنتشر فى البلد لا للنظام السابق ولا للحزب الوطنى المنحل ولا للفلول وبعدين لا للعسكر  وبعدين لا لمجلس الشعب المنحل ولا لحكم المرشد ولا للاخوان و لا لمرسى ويستمر المسلسل اللااات. كل دة بقى بيساوى اية لا للاستقرار ولا للاقتصاد القوى ولا لبلد ديموقراطى ولا لعيشة كريمة ولا لاى شىء جيد و مفيد للشعب والبلد, ولالالالالالالا ااااةةةةةةةةةةةةة وسمعنى احلى سلام على طول السلام. رااااحت خلاص , انا بقى هاعمل لا لرمضان فى الصيف عشان هنتعب قوى فى الحر. كل سنة وانتم طيبين

Sunday, June 17, 2012

ياترى ناويين على اية؟؟؟!؟؟؟

دة لبس الشرطة العسكرية الجديد فى وجود قانون الضبطية القضائية, ياترى ناويين على اية,بيفكرونى بفيلم ايرن مان, لكى اللة يا مصر استرها يارب

Tuesday, June 5, 2012

حكمة لمن بفهم

هناك حكمة او مقولة لو فهمتها تغيرك فعلا لو انت حابب وهى:حياتك لو لم تزد الحياة فاعلم انك انت زائد على الحياة. للتوضيح لو انت مش بضيف شىء للحياة يقى تعرف انك انت زيادة على الحياة كعدد فقط 

Wednesday, May 30, 2012

انتخبات الاعادة للرئاسة

انا ليا راى لو مش عايز حد من الاتنين اللى هايعيدوا فى انتخبات الرئاسة, انت تنزل بكل شياكة عشان تبطل صوتك وتروح على الخانات الموجودة عشان تعلم عليها للترشح وتكتب رايك انت, تشتم بقى تقول رايك تتف عليهم اللى يريحك وبكدة يبقى حققنا اهم هدف للانتخبات وهى التعبير عن رايك وصوتك الحر. كل انتخبات وانتم مرشحييين

Sunday, May 27, 2012

الصدمة والصمت

الصمت والصدمة يخيمان على معظم الشعب المصرى من نتائج الانتخابات الرئاسية, انا عندى اقارب و اصدقاء خارج مصر مستغربين ازاى يحصل كدة امال ثورة اية والكلام الكبير اللى عمالين تقولوة فى القنوات مستغربين من الواقع عكس الكلام ومش فاهمين ازاى, زى ناس كتير هنا بردوا مستغربة مش عارف ليية مستغربين و انتوا قاعدين و منزلتوش, دة طبع الشعب المصرى عايز كلة يجيلوا ديلفرى من غير تعب. يجماعة اللى يعرف ويفهم المصريين يفهم ان دة كان متوقع وطبيعى بس الناس هى اللى خدتها  الحماسة ومش بقت بتفكر بواقعية .استرها يارب هو اللى لينا دلوقتى وديما وابداا

Sunday, May 13, 2012

ماذا لو ؟؟!!!

انا هاتخيل تخيلات كدة وعايز اعرف ماذا لو حدثت فى الايام القادمة. اولا تفتكروا اية ممكن يحصل لو محمد مرسى مرشح الاخوان فاز بانتخبات الرياسة او نزل مثلا اعادة مع اى حد ومش فاز اية ممكن يحصل, خدوا بقى التانية الاقوى منها اية ممكن يحصل لو حصلت اعادة بين عمرو موسى واحمد شفيق؟!؟ تفتكروا هاتعدى على خير لو حصل حاجة من دوول

Friday, May 4, 2012

احتفالات العباسية

انا مش عارف لية الناس كانت خايفة وقلقانة من احداث العباسية دية كانت احتفالات بعيد ميلاد حسنى مبارك 4 مايو كل سنة وانت طيب ياباشاا. مينفعش يعدى كدة من غير اى تحية

Saturday, April 28, 2012

اين عقلاء مصر؟؟؟

اين عقلاء بلدنا اللى بنتمنى تكون احسن بلد , هى طريقة الاعتصامات والمظاهرات دية اللى هاتخلينا نتقدم انا عارف ان الوضع جديد علينا ولابد من فترة حتى تستوى الامور لكننا مع الاسف شعب عاطفى وجزء كبير جاهل ودة هايرجعنا ورررا مش يطلعنا قدااام, لو بتحبوا مصر اهدواا شوية عايزين نقدر نشتغل ومش نكرة فينا الدنيا كلهاا, فكروا بالعقل وبكل الامور و كل الزوايا ونفكر فى كل الاتجاهات مش اللى شايفينة وبس.حراام بجد بنضيع كل شىء حلو اتعمل بغباء الحمقى. يارب الفرج من عندك

Thursday, April 5, 2012

قالواا لا و هو عندة جووة

كلمتين كدة على السريع موضوع جنسية والدة المرشح حازم ابو اسماعيل انها لاتحمل الجنسية الامريكية وهى طلعت معاها , فكرتنى بنكتة قديمة ان واحد سال البقال عندك حلاوة قالواا لا وهو عندة جووة.ههههههههههه. مش عارف الوالدة معاها الجنسية ولا لا امال هيعمل اية فى شعب مصر. لكى اللة يا مصر

Thursday, March 22, 2012

بلدنا

مصر بجد ربنا حارسها بلد بيحصل فيها كل المصايب دية من اعتصمات واضرابات وازمة بنزين وسولار وغاز وبوتجاز واسعار مرتفعة وحمى قلاعية للماشية والفراخ بتموت واقتصاد متبهدل واحوال سياسية مضروبة بالنار, وبردوا البلد لسة صامدة, طبعا دة ستر من ربنا اولا واخيرا وبردوا ياكدلنا ان بلدنا دية مش هفية وقوية,ياريت نفهم دة ونحسة ونقدرة ونكبرها وتبقى من احسن بلاد الدنيا زى ماكانت على مر الزمان,بحبك يابلدى مهما حصل منك ومن شعبك

Monday, March 5, 2012

كلهم كلاب؟؟!!



دية مقولة بقولها ديما و كنت ديماا معلقها عندى فى اوضتى
 من ايام الجامعة وكان كل حد يشوفها يكون عايز يعرف مين هم الكلاب دوول؟
لكن انا عمرى مارديت , عشان انا سايبها لكل واحد يظبطها  لنفسة عشان اكيد كل واحد نفسة يقول الكلمة دية على حد معين وممكن الحد دة يتغيير بمرور الزمن او الموقف لكن  تبقى الكلمة موجودة, هى كلمة معبرة و مجازية عن اى حد نفسك  تقول كدة علية واكيييد فية وديما موجود. ولا ايية

Sunday, February 19, 2012

مجلس الشعب المنتخب

اللى هاتسمعوة دة انسب تعبير عن نقاشات مجلس الشعب المنتخب , والغريبة انة كلة نقاشات و بس و خناقات مفيش حلول, واللة القهوة بيحصل بردوا فيها نقاش بس الفرق انة بيكون فى حلول كمان مش كلة نقاش و بس, يمكن السر فى كوباية الشاى و المعسل. اتمنى ان ينال اعجباكم



http://youtu.be/h1RaalkrwKA

Monday, February 6, 2012

الكورة كمان وقفت؟

طبعا انا مش معترض ان الكورة تقف بسبب الاحداث الاخيرة واصلا كان لازم توقف من قبلها من فترة, بس انا فكرت باسلوب تانى المحاولات المتكررة لايقاف كرة القدم فى مصر من السنة اللى فاتت الى الحادث المريع ببورسعيد, مش يمكن يكون دة مقصود عشان الناس بتخرج الشحن اللى جواها و قرفها فى الكورة اللى بتنفس عنهم, كدة بقى ماسورة التنفيس اتسدت يبقى اكيد هايحصل انفجاار, وطبعا الانفجار دة هايتحول للسياسة و امور الدول المتبهدلة وتبووظ اكتر واكتر عشان البلد تقع اكتر واكتر, وجهة نظر العبد للة

Saturday, February 4, 2012

عقوبة المفسدون فى الارض ان يقتلوا

   .  عقوبة المفسدون فى الارض ان يقتْلوا
بمعنى ان لا يقتلوا قتل عادى لابد ان يكونوا عبرة للناس ارجوكم اقتلوهم هم مش احسن ولا اهم من اللى بيموتوا كل يوم بسببهم ولاد الكلب دوول لابد من محاكمة ثورية واعدااام عشان نرتاح بقى و نفوووق, حرراااام هم سبب كل المصايب دية و اللى بيساعدوهم من برة و هم احرار ,  هومفيش عقل ولا هى كوسة او كسكسى على حمصى. ربنا ياخدهم اخد عزيز مقتدر, امييين



Wednesday, February 1, 2012

موقعة بورسعيد = موقعة الجمل

واللة كنت متوقع انة لازم يحصل حاجة فى ذكرى يوم موقعة الجمل و الناس تموت تانى و الدنيا تولع, اهو حصل فى استاد بورسعيد الدنييا خربانة و مصر بقت خرابة خلالاص خلصت, سطو مسلح فى كل مكان و سرقات و قتل وهتك اعراض دة احنا عديينا الكفاار ياجدعاان, ربنا يستر لغاية يوم 11 فبراير يوم التنحى الاعظم, مفيش كلام اقولة ولا فى نفس ولا فى رغبة فى اى شىء , انا ليا سؤال معلش و ياريت حد يرد عليا فية, المجلس العسكرى و المشير اعلن الحداد 3 ايام عشان ضحايا المبارة ببورسعيد السؤال لية معملش كدة مع كل الضحايا اللى كانوا فى مجلس الوزراء و محمد محمود و ماسبيرو  عايز افهم اية الفرق مش كلة ضحايا ولا اية؟؟؟؟؟

Wednesday, January 18, 2012

الذكرى الاولى للثورة

بعد ايام قليلة يوم 25 يناير من الشهر الجارى تكون اول ذكرى لثورة 25 يناير 2011 , ليا سؤال اليكم  ياترى اية الفرق اللى حصل بين التاريخين دوول فى بلدنا؟
انا رايى المتواضع لاجابة السؤال دة ان الفرق الجوهرى والواضح جدااا فى تاريخ السنة فقط بدل 2011 بقى 2012. عظيمة يابلدى باولادك وانجازاتك, ابقواا قابلونى

Monday, January 16, 2012

لتر فى التانك؟؟؟

طبقا للظروف اللى احنا فيها من قلة وجود البنزين فى مصر والبوتجاز و كل حاجة و دة ديما بيحصل قبل اى مصيبة كبير تحصل فى بلدنا الجميلة على راى المقولة المشهورة لترفى  التانك و لا جنية فى البنك هو كدة الحال دلوقتى  والحكومة مصممة ان مش فى مشكلة واضح اننا كلنا بيتهيالنا و مش واخدين بالنا وخدوا المقطع دة منى لبتوووع البنزينة , اةةةة يابلد
video

Monday, January 9, 2012

اغنية مطلوب زعيم لفرقة كاريوكى

 اتمنى ان كلمات الاغنية تعجبكم وياريت نلاقى الزعيم المطلوب, شوفوها ومكتوب الكلام






video

مطلوب زعيم

لشعب طول عمره ...عظيم لشعب كان فعال زمان
لكنه هان حتا انه صار ...ما بين كبار وبين صغار
مفعول بيه بيقسمو ويفرقوا...بيقطعوا في عين اللى جابوا
واللى جابوا ابوه....علشان يموت او ينتهى
مطلوب زعيم ..لشعب حكموه خانوا
وتوهوا وغيبوا واللى انتبه منه ...وفاق غملوا عينه وكمموا
وسلموا فى المعتقل ..لكلاب جعانه يقطعوا
لكنه رغم القهر قام زقر وذم ..وفى اسبوعين ذلل حصور الجلدين
هد النظام فوق راس جميع الموفسدين
مطلوب زعيم..يحمى الحدود يعدل ما بين الناس تمام زى الفاروق
ويكون حنين على الفقير ...وعلى اللى فاسد يفترى
يهدم على دماغه الشقوق...ويعقله فى المشنقه
او يرفعوا على راس خذوق
مطلوب زعيم

ميقولش على الخوف حكيم ..ويكون كمان سمعه سليم
يسمع لنبضه قلبنا..ويكون مكانه فى وسطنا
ما يعيشي ابدا في القصور...والبعض منا للاسف ساكنين قبور
يشرب و ياكل اكلنا....ويعيش كاواحد مننا
يسمعلنا ويشور وياخد راينا...وقت الخطر نتلم حواليه كلنا
ونضحى وياه بعمرنا
مطلوب زعيم
على المسؤليه يكون امين...ويكون جرئ ويكون شجاع
يمشى على خطه دافع...يعرف يقول للظلم لا
ويموت ولا يفرق فى حق
مطلوب زعيم

نقدر نحاسبه بالقانون ..اونعزله لو للامانه يوم يخون
لا يشترط للشكل ايه...لا يشترط للسن اية


لا يشترط للمله ايه..شرطه الوحيد يكون بشر
بالاختصار مطلوب دكر

ذكرياتنا القديمة

اكيد كلنا لينا ذكريات سواء فى الطفولة او مرحلة المراهقة او مرحلة الجامعة او فى المصايف والاجازات الى اخرة.... وبلاشك ان الذكريات دية خصوصا الجميلة منها بتبعث فيك الامل والنشوة والسعادة من جديد تخليك تكمل حياتك فى  مراحلها  الصعبة, نشكر اللة على نعمة تذكر تلك الذكريات بالرغم من انة من الممكن ان نتذكر ايضا اشياء غير جميلة من الماضى ولكن هكذا هى الحياة بكل معانيها الحلوة والمرة, حقيقى ما اجمل الذكريات خصوصا لو لاقيت ذكرى منها تتجدد امامك مرة اخرى وتنعش احاسيسيك وشعورك واحلامك القديمة. بجد احساس جميل يرجعك لى احلى سنين عمرك

Sunday, January 1, 2012

تعريف الغربة باسلوب عفوى ومفهوم

دية صفحة من كتاب بلال فضل اسمة بنى بجم عجبنى توصيفة لمفهوم الغربة واحساس صادق بشرح مثل حيوى و جميل ورقيق واحيانا مؤلم, تحياتى لة ولكم