our life

شرح عجبنى لحال بلدنا

2012-01-29T00:56:00.000-08:00

الذكرى الاولى للثورة

2012-01-18T22:31:00.000-08:00

بعد ايام قليلة يوم 25 يناير من الشهر الجارى تكون اول ذكرى لثورة 25 يناير 2011 , ليا سؤال اليكم ياترى اية الفرق اللى حصل بين التاريخين دوول فى بلدنا؟
انا رايى المتواضع لاجابة السؤال دة ان الفرق الجوهرى والواضح جدااا فى تاريخ السنة فقط بدل 2011 بقى 2012. عظيمة يابلدى باولادك وانجازاتك, ابقواا قابلونى

لتر فى التانك؟؟؟

2012-01-16T22:48:00.000-08:00

طبقا للظروف اللى احنا فيها من قلة وجود البنزين فى مصر والبوتجاز و كل حاجة و دة ديما بيحصل قبل اى مصيبة كبير تحصل فى بلدنا الجميلة على راى المقولة المشهورة لترفى التانك و لا جنية فى البنك هو كدة الحال دلوقتى والحكومة مصممة ان مش فى مشكلة واضح اننا كلنا بيتهيالنا و مش واخدين بالنا وخدوا المقطع دة منى لبتوووع البنزينة , اةةةة يابلد

اغنية مطلوب زعيم لفرقة كاريوكى

2012-01-09T23:00:00.000-08:00

اتمنى ان كلمات الاغنية تعجبكم وياريت نلاقى الزعيم المطلوب, شوفوها ومكتوب الكلام

مطلوب زعيم

لشعب طول عمره ...عظيم لشعب كان فعال زمان
لكنه هان حتا انه صار ...ما بين كبار وبين صغار
مفعول بيه بيقسمو ويفرقوا...بيقطعوا في عين اللى جابوا
واللى جابوا ابوه....علشان يموت او ينتهى
مطلوب زعيم ..لشعب حكموه خانوا
وتوهوا وغيبوا واللى انتبه منه ...وفاق غملوا عينه وكمموا
وسلموا فى المعتقل ..لكلاب جعانه يقطعوا
لكنه رغم القهر قام زقر وذم ..وفى اسبوعين ذلل حصور الجلدين
هد النظام فوق راس جميع الموفسدين
مطلوب زعيم..يحمى الحدود يعدل ما بين الناس تمام زى الفاروق
ويكون حنين على الفقير ...وعلى اللى فاسد يفترى
يهدم على دماغه الشقوق...ويعقله فى المشنقه
او يرفعوا على راس خذوق
مطلوب زعيم

ميقولش على الخوف حكيم ..ويكون كمان سمعه سليم
يسمع لنبضه قلبنا..ويكون مكانه فى وسطنا
ما يعيشي ابدا في القصور...والبعض منا للاسف ساكنين قبور
يشرب و ياكل اكلنا....ويعيش كاواحد مننا
يسمعلنا ويشور وياخد راينا...وقت الخطر نتلم حواليه كلنا
ونضحى وياه بعمرنا
مطلوب زعيم
على المسؤليه يكون امين...ويكون جرئ ويكون شجاع
يمشى على خطه دافع...يعرف يقول للظلم لا
ويموت ولا يفرق فى حق
مطلوب زعيم

نقدر نحاسبه بالقانون ..اونعزله لو للامانه يوم يخون
لا يشترط للشكل ايه...لا يشترط للسن اية

لا يشترط للمله ايه..شرطه الوحيد يكون بشر
بالاختصار مطلوب دكر

ذكرياتنا القديمة

2012-01-09T00:10:00.000-08:00

اكيد كلنا لينا ذكريات سواء فى الطفولة او مرحلة المراهقة او مرحلة الجامعة او فى المصايف والاجازات الى اخرة.... وبلاشك ان الذكريات دية خصوصا الجميلة منها بتبعث فيك الامل والنشوة والسعادة من جديد تخليك تكمل حياتك فى مراحلها الصعبة, نشكر اللة على نعمة تذكر تلك الذكريات بالرغم من انة من الممكن ان نتذكر ايضا اشياء غير جميلة من الماضى ولكن هكذا هى الحياة بكل معانيها الحلوة والمرة, حقيقى ما اجمل الذكريات خصوصا لو لاقيت ذكرى منها تتجدد امامك مرة اخرى وتنعش احاسيسيك وشعورك واحلامك القديمة. بجد احساس جميل يرجعك لى احلى سنين عمرك

تعريف الغربة باسلوب عفوى ومفهوم

2012-01-01T23:57:00.000-08:00

دية صفحة من كتاب بلال فضل اسمة بنى بجم عجبنى توصيفة لمفهوم الغربة واحساس صادق بشرح مثل حيوى و جميل ورقيق واحيانا مؤلم, تحياتى لة ولكم

عام جديد يارب يكون سعيد

2011-12-30T23:00:00.000-08:00

كل سنة و انتم طيبين وعلى بلدنا الجميلة يكون سعيد وجديد فى كل شىء.يارب

اول بيان لهيئة الامر بالمعروف والنهى عن المنكر

2011-12-25T23:01:00.000-08:00

خدوا اول بيان لهيئة الامر بالمعروف والنهى عن المنكر التابعة لحزب النور السلفى , وابتدى ابتدى ابتدى ... ابتدى المشوار البسوووا بقى , و دة اللينك بتاع البيان من جريدة الشروق http://www.shorouknews.com/news/view.aspx?cdate=26122011&id=98651821-8f5f-4a35-8173-01e110cfb310

لا تلاعب العبيط ....؟

2011-12-18T01:45:00.000-08:00

انا دلوقتى فى ظل الظروف اللى بتحصل و الكلام و الرغى الكتير اللى حوالينا من كل مكان بقيت اعمل شىء واحد علشان اقدر اعيش فى سلام و هدوء نفسى وسط القلق والاضطراب الرهيب اللى فية بلدنا الحبيبة اية هو بقى اللى انا عملتوا .... قررت عدم دخول فى اى نقاش سياسى او اى نوع من النقاشات علشان كل الناس بقت متحفزة ديما و كلام انفعالى و بس حتى لو هو فاهم مابالك بقى كمان لو هو مش فاهم واى كلام بيتقال و خلاص و خناقات, فعملت بالمثل الجميل الى هو لا تلاعب العبيط ولا تخلى العبيط يلاعبك عشان لو لاعبت عبيط يا هيموتك يا هايعورك و انت الخسران فى الحالتين وبينى و بينكم مش طالبة موت ولا خراب ديار , خصوصا ان المواضيع بقت كتير و العيال كترت فى الاعتصمات وفى الشاشات الفضائية سواء من ناس بتتكلم او محاورين فبردة عملت بالمثل الجميل اللى بيقول , اللى يلعب مع العيال ميخلاش من .... طبعا كلكم عارفين الباقى و اللى مش عارف يسال عشان مش اقدر اكتبها حرصا للذوق العام والاحترام لكم. يارب استرها على بلدنا بجد قولواا امييين

زياادة الاجور او تحسين المعيشة

2011-12-12T22:54:00.000-08:00

لية كل الناس بتشوف من زاوية واحدة بس و هو موضوع ان الاجور تزيد, اكيد طبعا الفلوس مهمة جدا لكن لو نفكر اهميتها لية اكيد علشان امور المعيشة من اكل و شرب وملبس و مسكن وعلاج ومصاريف مياة و كهرباء ومدارس كل دة اساسيات حياة, غير بقى الاشياء الاخرى التى تعتبر رفاهيات مثل سيارات تلفونات محمول جديدة كمبيوترات ولابتوبات الى اخرة.... دة اللى كلنا عايشينة وحاسين بية. بص بردوا كلنا مركزين على زيادة الاجور , طيب لية مش نفكر بالعكس بمعنى ان الاجور اللى تستحق انها فعلا تزيد هى اللى تزيد مش كلها علشان البلد مش تخرب لكن بشرط مهم جداا وهو بقى اية اننا نحسن اللى بنصرف فية الفلوس بمعنى ان العلاج يتوافر للكل بقيمة رمزية او مجانية التعليم للكل بمستويات مادية مختلفة لكى يتيح للكل حق العلم و المعرفة ,السكن بمواصفات واسعار متفاوتة و معقولة علشان اللى عايز يلاقى سكن يلاقى اللى يناسبة , الطرق بدل بهدلة العربيات فيها و الحوادث و الناس اللى بتموت تتحسن يبقى هتوفر ثمن اصلاحات للسيارة ونحافظ على المواطن وكمان اسعار الكهربا تقل بدخول الغاز لطاقة الكهرباء و تقليل التكلفة و المياة كمان نظبط اسعارها و مواردها المهدرة والى اخرة . اذا لو كل دة حصل والرقابة موجودة على كل شىء والاسعار يبقى الاجور هاتكفى وممكن تحوش كمان علشان اللى كنت بتصرفة فيها وتستلف كمان فوقيها كلة اتظبط و بقى فى حدود المعقول بالنسبة لاجرك والمعيشة تبقى جيدة على الاقل. يبقى ممكن نحسن كل دة و مش شرط اجور تزيد بدل مانزود فلوس و خلاص والحاجة تولع نار يبقى نبداء من الاساس وكلة هايتحل بالتدريج , بس لو مش اى شىء من دوول حصل يبقى انت اكيييد فى مصر

ارض اللة واسعة

2011-12-07T02:49:00.001-08:00

سبحان اللة واللة ربنا كريم على عبادة,هاقولكم ليية انا لسة قارى دلوقتى ان الممثلين السوريين بداءو انهم يمشوا من سوريا علشان القلق اللى هناك و ينقلوا نشاطهم فى منهم اللى جية مصر و اللى راح امريكا و هكذا , ونفس الموضوع عندنا فى مصر الاخوة المسيحين اللى خايفين من التيار الاسلامى انة يحكم مصر بردوا بيفكروا يمشوا و يهاجروا منها وبردوا فى مسلمين من مصر قلقانين وبردوا عايزين يسافروا احتياطى, وطبعا الممثلين والفنانين سواء مصريين او عرب قلقانين وبيفكروا هم كمان يخلعوا من مصر.
احب اطمنكم جميعا اللى عايز يهاجر او يمشى من اى مكان لمكان تانى ان ربنا كريم و مش بينسى عبيدة ابداا خصوصا المخلصين منهم , لية بقى لسة من يومين تم اكتشاف كوكب شبة الارض بالظبط وكمان فى نجم بيدور حوالية زى الشمس وسموة تؤام الارض.
يعنى اللى عايز بقى مش هجرة و بس دة هايسيب الكوكب كلة ويبداء من جديد مع الكوكب الجديد بس على اللة مش يلاقوا هناك الاسد و لا حسنى ولا سلفيين ولا متشديدن ولا فساد, علشان اصل الكواكب القانون الجديد ونص التشطيب والمحارة فيهم ازمة اليومين دوول زى ازمة الانابيب اللى عندنا, الحق احجز بقى على اول صاروخ طالع

يومك يا مصر

2011-11-29T00:19:00.000-08:00

يومك يا مصر بداء باول مرحلة بالحرية والنزاهة , وقفنا ساعات و كلنا حب لبلدنا و مش همنا تعب ولا عطلة بس كلة فرحان انة بقى ليية قيمة فى بلدة و دة اهم احساس انة يكون ليك اهمية ودة او الاحساس بالحرية و المسؤولية, يومك يا مصر

النيل حزين وغاضب

2011-11-18T07:22:00.000-08:00

حتى النيل حزين على احوال حبيبتة واللى بيحصل فيها من تقطيع ونهش فى عرضها و من ميين من اهلها, و من حزنة لا يسمح بوجود مركب للفسحة على سطحة
والاستمتاع لكى لا يشارك هو الاخر فى نهش عرضها مع اهلها لانها حبيبتة الوحيدة و الابدية ولانة غاضب منهم و من افعالهم فى حبيبتة مصر

مصر رايحة لفيين؟

2011-11-11T02:32:00.000-08:00

السؤال الدائم لكل السياسيين فى البرامج ولاى حد فى كل البرامج فى الفضائيات هو مصر رايحة الى اين؟. والرد الطبيعى و السهل لاى شخص عايش فى مصر وانسان عادى انة كان لازم تسال قبل ماتركب. صح ولا ايية

كل عيد ويارب يكون سعيد

2011-10-31T01:39:00.000-07:00

كل عام وانتم بخير بمناسبة عيد الاضحى , نفسى اقولكم عيد سعيد بس الحقيقة مش قادر فى ظل الوقت الراهن, بجد من كتر المشاكل و القرف اللى احنا فية حتى لو فى حاجة تسعد الواحد و لا بيكون ليها اى طعم او احساس حاجة بجد زفت, على كدة بقى النظام السابق كان شايل بلاوى او عاملها بس مكتم تمام عليها علشان الشعب يعيش. ما علينا كل اللى عايز اقولة , اتمنالكم عيد يكون يارب سعيد

الكلام اخد و عطا

2011-10-23T02:11:00.000-07:00

الكلام اخد و عطا , كلمة معروفة لينا كلنا فى حالات البيع و الشرا او الجواز والاتفاقات اللى بين الناس, وشوية عليك و شوية علينا علشان بردوا نقرب الامور و الدنيا تمشى كل دة بيحصل كل يوم و كل ساعة و الدنيا بتمشى , ودة كلة كلالام مصريين من الشارع. طيب لية بقى مش بيحصل الكلالام دة بين الاحزاب وبين الشعب و بين المجلس العسكرى علشان البلد تمشى و تقوم من تانى مع الكل مع بعض. لكن كل واحد شايف نفسة هو الخصم و الحكم هو وبس اللى صح , يعنى دة كلالالالام الرحمه بقى ياهوووو

قرفت خلاص

2011-10-10T00:14:00.000-07:00

خلالالاص قرفت من اى شىء بيحصل فى البلد كلة مصايب وقرف وقتل و خناقات الناس قرفت بقى اللة يخرب بيوتكم. احنا ضايعين ضايعين لا محالة خلصت كدةةة وتفوووا على قبرى لو اتعدلت ضيعنا حلمنا بنفسنا يبقى محدش بعد كدة يقول جاى و يفتح بقة. احة بجد من امتى بنموت فى الجيش بتاعنا .يارب طلعنا منها على خير نسيب البلد ونتابع من برة بلا قرف

البيضة ولا الفرخة؟!

2011-10-04T00:33:00.000-07:00

ياترى البيضة اللى اتوجدت الاول ولا الفرخة؟ دة طبعا سؤال ازلى كلنا عارفينة و هو الغرض منة انك تفضل تلف وتدور حوالين نفسك من غير ماتلاقى اجابة. هو دة حال بلدنا حاليا كل شوية ناس يكونوا عايزين حاجة وتتحقق بس بطريقة مش عجباهم يرفضوا ويقولوا لا مش كدة عايزنها بطريقة تانية ويعملوها تقوم مش تعجب ناس تانية ويقولوا لا مش كدة عايزنها بطريقة تالتة , ودوخينى يا لمونة وابقى قابلونى لو البلد دية وقفت على حيلها. قدامنا 6 شهور ونعلن افلاسنا كبلد عريقة فى التاريخ زى اليونان كدة ماهى بردوا عريقة. سلملى على العرااقة والحضارة

ياترى فى علاقة؟

2011-09-27T02:48:00.000-07:00

السؤال دة بخصوص ازمات السولار و البنزين اللى بتحصل الفترة اللى فاتت بعد الثورة و ديما تحصل قبل تفجير خط من خطوط الغاز؟ ياترى ليية وتفتكروا فى علاقة بين بعض ان البنزين و السولار يشحووا من السوق و يتهربوا ويتباعوا باسعار عالية و كمان الغاز مقطوع مش يمكن ولا انا مريض بنظرية المؤامرة؟

تجيبها كدة تجيلها كدة هى كدة

2011-09-21T00:05:00.000-07:00

طبعا العنوان اللى انا كاتبة اقصد بية البلد و حالها وكمية الاضرابات سواء فى التعليم و الدولة معندهاش قرش تصرفة و هانجوع قريب جداا و يتبرعوا لينا زى الصومال, مفيش فايدة كلة يلا نفسى و بس اةةةةة يابلد عايزة ولد, لما انتوا كدة ورجالة قوى كنتوا فين من زمان ولا علشان مش ليها كبير واحنا مش محترمين علشان مش بنقدر و لا بنحترم اى شىء من غير لما يكون ورانا حد ماسك العصايا علشان نبقى ملتزميين. انا عارف ان فى ناس كويسة بس الاغلب اللى احنا شايفينة و حاسينة زى ما انتوا عارفين, وهى بلدنا كدة لسة بدرى اووى على الحريات والكلام الكبير دة لسسة كتييير جدااا,وعلى فكرة مش هاتنعدل و اقروا تاريخ مصر كويس وانتوا تعرفوا اننا لازم نتمسك و ننساق و بس.واللة انا مش من الفلول دة انا حتى عضو مؤسس فى حزب لكن انا بتكلم عن واقع حصل فى الماضى و معروف وواقع ملموس حاليا. احنا يومنا بسنة الدول الديموقراطية الحالية شعوبها خدت من 3 الى 10 سنين علشان تبقى فى وضعها الحالى كل بلد على حسب ظروفها وشعبها,ياترى احنا هناخد كام سنة دة لو حصل اصلا.تجبها كدة تجيلها كدة مصر كدة

اول يوم دراسة

2011-09-18T00:16:00.000-07:00

ديما فى اول يوم صابح دراسة بيبداء من ليلتها كدة احساس مش لطيف سواء من حزن وملل من الايام اللى جاية بالدراسة و التحكمات بقى فى مشاهدة تلفزيون او لعب وكل واحد بقى يخترع اشياء للهروب من المذاكرة و كدة. لكن المهم ان ليلة اول يوم دراسة عجيبة اوى ديما يكون فيها شوية هواا كدة بليل او لسعة برد خفيفة حتى لو فى الصيف و تحس ان الليل دخل بسرعة و الوقت بطىء و جو من الكأابة اكنك رايح سجن. مش عارف لية ديما الليلة دية كدة و تحس ان الجو العام اتغير و هدووء قاتل فى الشوارع حتى المزدحمة. اكنة جو تعبئة عامة للدراسة, واول ما الصبح يجى جيوش من التلاميذ فى الشوارع اللى فرحان و اللى مخنوق و بيعيط خصوصا اللى اول مرة يروح و يسيب النعيم اللى كان فية. وكلاكسات اتوبيسات مدارس و ميكروباصات. كاانت ايام بس الغريب انها بتتكرر بنفس الطريقة و الشعور كل سنة سواء لييك سابقا او اولادك حاليا. كل سنة و انتم طيبين

سلمولى على مصر اللى كانت

2011-09-10T23:58:00.000-07:00

لما تشوفوا مصر اللى كما نعرفها ابقوا سلمولى عليها, انا مش بقول كدة علشان انا كنت مع النظام لا طبعا , انا بس بترحم على العقوول اللى غابت و بتفضل مصلحة و بس وعلى الاخلاق اللى راااحت. وفووق كل دة اللى المفروض انهم ماسكين البلد فى المرحلة دية وانهم المفروض ناس بتفهم طلعوااا بطييييخ, لازم المجلس العسكرى يحافظ على البلد باى شكل و مش يهمة غير مصلحة مصر و بس انا بقول باى شكل قانون طوارىء بقى حظر تجوال اى حاجة الناس اللى بتفهم و بتحب مصر مش هاتقول لا علشان يحافظوا على البلد و حياتهم و مصالحهم كمان. المشكلة ان المجلس مش لعبتة السياسة و الحركات دية دول ناس عسكريين يكون فى موقف يتعاملوا معاة دة دورهم لكن بقى شغل اللى من تحت لتحت دة مش لعبتهم لعبة بشوات الداخلية اللى مقضينها و سايبنها تخرب, والنبى لما تشوفوا مصر سلمولى عليها

مرة واحدة بس

2011-08-31T00:35:00.000-07:00

الانسان فى حياتة اشياء تحصل مرة واحدة بس, يعنى بيعيش مرة واحدة و بس,وبيموت مرة واحدة وبس,ممكن يتجوز او يخلف مرة وحدة و بس,وممكن يبقى غنى مرة فى العمر و بس,كلها بتكون فرص مرة وحدة بس فى العمر كلة علشان كدة لازم يكون واعى لذلك و يستغل المرة اللى بتحصل فى انة يجييد استعمالها,زى الحالة اللى بلدنا فيها الان فرصة كبيرة للحرية والتقدم اتمنى اننا نكون فعلا واعيين لاستغلالها علشان لو راحت ربنا الاعلم بس هاتتكرر تانى ولا لا , يارب نكون واعيين ونستغلها صح للعيش بكرامة و حرية و رخاء الى اخر العمر ولمستقبل افضل لاولادنا بدل ما يلعنوا ابونا اننا ضيعنا الفرصة انهم يعيشوا احسن مننا, اتمنى ذلك

كل عام و انتم بخير

2011-07-31T00:33:00.001-07:00

رمضان كريم وكل عام وانتم بخييير

حالنا كامواج البحر

2011-07-18T01:07:00.000-07:00

ممكن اقول واوصف حال بلدنا الايام اللى بنعيشها حاليا من بعد الثورة من تقلبات وفوق وتحت ويمين و شمال, زى امواج البحر,زى الواحد و هو فى البحر و الموج شديد وساعات يقلبك وانت بتكون جواااة عمال تلف حولين نفسك مش عارف تاخد نفسك ومش لاقى مخرج من الدوامة اللى فى الموجة , ويدوب تاخد نفسك مرة و بعدين تغرق تانى , هو دة حالنا اللى بنعيشة حاليا ,كل فين و فين لما نلحق ناخد نفس علشان مش نموت , يارب نلحق نوصل على البر بالسلامة قبل ما الانفاس تخلص ونرووح فيها

شعار الشعب الجديد

2011-07-10T00:09:00.000-07:00

لكل وزير او رئيس وزراء او المجلس العسكرى علشان المظاهرات و الاعتصمات و اللى بالى بالكم مش تحصل و نخلص بقى , فليكن شعار الشعب الجديد ادينى حقى وانا مفتحش بوئى علشان نرتاح بقى و نفوق شوية

مقطع من اغنية حالنا حال لفرقة بساطة

2011-07-06T00:19:00.000-07:00

انا لو ماقولتش نكبر نطنش نشيلها من دماغنا بلدنا فيها خير ولو عندك ضمير هتتغير حياتنا فينا الحلو اكتر ليه فالوحش نفكر ليه بنبوظ صورتنا بلدنا احنا اللى فيها ويا نعدى بيها ينفضل زى ما احنا

يارب نعدى بيها على خيير يااارب

اسمى فى جرنال الجمهورية لموسسى حزب المصريين الاحرار

2011-06-26T01:46:00.001-07:00

شايفين الاسم منور ازاى ولا الرقم المميز 787 اللهم يجعلنا زخرااا للبلاد هههههههههههههه

الثورة راحت فيين؟؟

2011-06-23T04:21:00.000-07:00

حد يعرف الثورة راحت فين ولا بقينا حاسين بيها ولا شايفين انجازات ولا اى بوادر امل جديدة, وكأن فرحة الثورة راحت و خلصت لما بسمع كلمة ثورة 25 يناير اكنى بفتكر ايام بعيدة فى حياتى كانت كلها امل وحماس وتطلع للافضل, لماذا هذا الركود , حد يقولى فى اية كلة كلام و خناقات ومفيش حاجة بتحصل, اخرها امس محافظ القاهرة بيقفل فى وش محمود سعد فى مكالمة تليفونية فى قناة التحرير,علشان بيسالوا على اكوام الزبالة اللى فى القاهرة والمحافظ يقلة هانعمل تجربة لمدة شهر فى حى مدينة نصر و نشوف النتيجة راح التانى رد علية وقالوة على كدة لما توصلوا شبرا يبقى السنة اللى جاية, راح البية المحافظ اتعصب وقالة مش من حقك تقييمنى . نعم يا حيلتها امال مين اللى يقيمك اذا كنت انت فى خدمة الناس عايز مين يقيمك, وقفل السكة. وقال محمود سعد واضح انهم جابوا رئيس الوزراء بس اللى من التحرير و الباقى هو هو, عايزين ثورة فى كلة مش منظر و بس حراام واللة بتضيعوا الحجات الحلوة, مرة عمر اديب قال كلمة وطلعت صح قال احنا دايما منفردين اول شعب يعمل ثورة رائعة و هو بردوا اللى بيبوظها , دة فعلا بجد بيحصل. اخر حاجة بردو من كلام ابراهيم عيسى ان عصام شرف تقدم بتغيير 13 وزير و المجلس العسكرى رفض راح منزلهم الى 6 راح المجلس معيين وزير الخارجية الجديد بدل العربى . تحياا مصر

يلة نعمل فورمة الساحل

2011-06-16T02:44:00.000-07:00

الساحل و جمالة وهو فاضى ورايق اجاازة بقى شوية

حبة فرفشة

2011-05-28T00:52:00.000-07:00

شايفين الجمال و الناس اللى تستحق فعلا الحرية مش احنا

لماذا العربى؟!؟

2011-05-15T23:47:00.000-07:00

اتسال وارجو اجد الرد لماذا تم ترشيح و تعيين نبيل العربى وزير الخارجية المحترم جداا والناجح فى فترة قصيرة؟
هناك ثلاث اجابات و اختار بينهم والاجابات مش وجهة نظرى انا بس لكن الراى العام كمان. اولا: ضغط من امريكا و اسرائيل لعدم رضائهم عنة من البداية و كمان علشان بداء ان تبقى مصر نداا لاسرائيل زى الاول وعودة علاقتنا مع ايران
ثانيا: ضغط من دول الخليج لانزعاجهم من بداية عودة العلاقات مع ايران وهى تتدخل فى الشأن الخليجى حاليا. ام ثالثا: وذلك لان الدكتور مصطفى الفقى كان سيخسر الامانة للمرشح القطرى ولابد ان مرشح مصر هو يكون الامين للجامعة.
فى جميع الاحوال خسرنا وزير خارجية ممتاز و قوى جداا . و هنيئا لتحكم قطر بالعرب وسيطرتها و ايضا ارضاء امريكا و اسرائيل. يبقى كدة رجعنا تانى زى ما احنا و سلملى على الثورة

مووت الرابع و امشى؟!؟

2011-05-10T00:23:00.000-07:00

الحكاية اللى هاقولها دي حقيقية لانها حدثت لشخص اعرفة, كان مسافر اسكندرية مع مراتة و بناتة الاتنين و معاة مبلغ, المهم كالعادة طلع 4 من اللى بنسمع عنهم كل يوم وقفوة ونزلوهم , وقالوا هات العربية و اللى معاك والاهناخد مراتك و بناتك , قالهم خدووهم , زفعلا و هم ماشيين بيهم راح سحب المسدس من العربية و ضرب عليهم نارر موت 3 و الرابع انصاب, راح مكلم الشرطة العسكرية علشان يجواوا و كدة ويسالهم يعمل اية , قالوا لة اقتل الرابع و امشى !!!! وفعلا عمل كدة و رجع بالسلامة , اماااان يا مصر واللة

الفتنة الطائفية

2011-05-08T00:31:00.000-07:00

مش هاقول بقى دوول قلة و الكلام دة , احنا فى فوضى فى كل شىء و دة انسب وقت للعب فى كل حاجة , زى السلفيين اللى كل يون بيعملوا مظاهرة مع انهم فى مبادئهم بيمنعوا التظاهر , و مرة كاميليا و كرة عبير و بكرة نادية و فايدة و عايدة , حاجة تقرف, بالسلامة يا مصر , كل ما نتعدل شوية نرجع 100 خطوة وراا, الحل هو الهجرة يجماعة صدقونى, نحن شعوب لا تعرف معنى حرية انما شعوب تسااق فقط كالبعير

حال بلدنا

2011-04-19T02:33:00.000-07:00

الصورة دية معبرة عن بلدنا , الغيوم اللى موجودة هو الفساد اللى فى بلدنا من سنين و شعاع الشمس هو شعاع الحرية و الكرامة و العدالة , اللى بعد شوية هيغطى على الغيوم والسما تبقى صافية و جميلة زى بلدنا ان شاء اللة, بحبك يا مصر بجد

مصر بتروح مننا؟؟؟!!!

2011-04-02T22:12:00.000-07:00

طبعا كلنا شفنا اللى حصل فى الاستاد, مصر فعلا بتروح مننا , الناس اياها اللى لسة متسابة بيشتغلوا صح جدااا علشان يرجعوا تانى , انسواا بقى حريات و لا اقتصاد و لا سياحة و لا حيااة فى البلد, واللة مافى نفس لاى شىء اقولة من اللى بيحصل لينا و فى بلدنا , لكى اللة يا مصر

كلمات اغنية فيها حاجة حلوة

2011-04-01T08:35:00.000-07:00

" فيها حاجة حلوة . حاجة حلوة بيناحاجة كل ما تزيد زيادة فيها إنةفيها نية صافية .فيها حاجة دافيةحاجة بتخليك تثبت فيها سنة سنةمصــــر هى الصبح بدرى.مصـــر صوت الفجر يدنسوبيا . فول . طعمية .كشرى. دوم . بطاطا سخنة جداااامصــــر اول يوم العيد .عيدية .بمب ولبس جديدميكروباص واتوبيس ومتروو . حفلة تلاتة فى سينما متروموائد رحمن . فانوس رمضان . مسلم فى بيت مسيحى فطروواترنيمة لايقة على تخت غنى . تأييلة العصرية ولمة على الطبليةفى مصر مولد السيدة والذكر والهيصة وركعتين بركة فى السيدة نفييسةوالمشى ع الكورنيش . دى تتعبك ولا بتسيبهاتحيرك برضه حاببها على بعضها كدا بعيوبها حتة منكفيها حاجة حلوة . حاجة حلوة بينا الاغنية دية ديما بسمعها كل ما احس ان البلد مش مظبوطة و مخنوق منها و من اللى فيها وبعد ما اسمعها اروق واحبها اكتترر "

السلفيووون؟؟!!

2011-03-27T00:09:00.000-07:00

اعذوروا جهلى بمعرفة السلفيون كنا زمان نسمع عنهم بس تيارى كدة, لكن لايام دية ظهروا بقوة والعن من الاخوان , مرة يقطعوا اذن مواطن مصرى قبطى مش عارف لية بيقولوا بيقيموا الحد مع ان كل حدود الاسلام مفيهاش قطع ودن دية يمكن اسلام السلفين غير الاسلام المعروف, ودلوقتى خبر انهم بيدواا مهلة يومين لست و بنت فى مدينة السادات علان يرحلوا منها علشان منحرفين, اية اللى بيحصل ميين دوول,واضح ان الثورة المضادة شغالة تمام التمام وربنا يستر على البلد و اللى فيها, مش عارف لية مش حاسيس ان فى خطوط معينة لكى نعمل بها لتقدم البلاد واضح ان الفساد كان فى كل البلاد و كلة ضد الحساب و الثورة علشان ميجيش دورهوم, وانا غير متفائل و ربنا يسترها

بيدور على رمز الهلال

2011-03-20T12:11:00.000-07:00

انا مش هاكتب كتير , بعد ظهور نتيجة الاستفتاء بتاكد كل يوم من بعد رحيل مبارك انهم كانوا صح فى حجات كتير, زى ما قال عمر سليمان احنا غير مستعدين للديموقراطية, انا لا اعترض على النتيجة لكن لما اشوف بعينى هنا فى مدينة نصر توزيع فلوس على الفواعلية علشان يقولوا نعم , دة غير الاخوة الفلاحين و الصعايدة اللى بيقبضوا و يروحوا يعلموا و شفناهم على الفضائيات خارجين يقولوا احنا مش لاقين رمز الهلال دة طبعا حافظ مش فاهم انة مش فى انتخبات مجلس الشعب بس هو معزور علشان فى الحالتين بيبقض فى فاكر انها هى هى, المهم ان الناس كانت نازلة بجد فى اماكن كتير, وربنا يكرم بلدنا لما هو صالح اليها وعلينا تقبل النتيجة وننسق افكارنا لما هو لصالح بلدنا

مصر ريحتها وحشة

2011-03-08T03:30:00.001-08:00

مما لاشك فية ان بلدنا الايام دية عمالة تطلع كل النفايات والقاذورات التى كانت على مر السنين الماضية, تحس ان بلدنا ريحتها بقت وحشة من كتر اللى بنشوفة و نسمعة من فساد و مفسدين و بلاوى سودة, مش عارف اقول اية بجد بس انا هاشبها بشىء معروف و مقرف شوية, اكنك بتعمل عملية لتنظيف جرح او خلع ضافر مدوحس او او او , المهم انك لازن تشيل القديم و تنضف كويس قوى كل القاذورات و القرف والوساخة علشان يبقى على نضيف و اللى يطلع يبقى مزبووط علشان يتبنى على اساس صح و مش يحصل مضاعفات تانى ونعمل عملية تانى, هو دة حال البلد دلوقتى هرج و مرج و كل شىء وحش ومقرف بس دة طبيعى جداا, بعد القيام بعملية لتطهير مكان متلوث و بة فطريات و عفن لمدة ثلاثون عاما يبقى العملية مش سهلة و لسة هاتطول علشان الجرح ينضف, عذراا للالفاظ و التشبيهات المقرفة بس دة اقرب وصف انا شايفة للواقع

المصرى دائما مبهر و معجز

2011-02-20T22:29:00.000-08:00

اذا اراد الانسان المصرى شيئا بقوة و حماس و اقتناع دائما يكون شىء مبهر و معجز, والتاريخ يشهد على ذلك على مر السنين, واقربها طبعا عبور اكتوبر الذى الذى ابهر العالم واخيرا وليس ااخرا ثورة المصرين فى 25 يناير التى احترمها وتحدث عنها العالم اجمع وانبهر بحضارتها ورقيها بالرغم اننا من وجهة نظر العالم دول عالم ثالث و متخلف, يعيش الانسان المصرى المبهر والعظيم على مر السنين

كرامة المصرى عالية الان

2011-02-15T23:07:00.001-08:00

اول نتيجة لثورة 25 يناير ان كرامة المواطن المصرى اصبحت عاليا داخليا وخارجياا منذ فترة كبيرة جدااا,سمعت فى كثير من البرامج ما حدث مع مصريين يعيشون بالخارج, منها انا المصريين بدول اوروبية كثيرة وامريكا ان جيرانهم وقرانئهم فى العمل اخذوا فى التوافد عليهم للتهنئة ويخبرونهم انهم الان فقط من العالم الحر والنظرة تغيرت 180 درجة لهم, والحدث الاخر الاكثر فخرا ان مواطن مصرى رجل اعمال ذهب الى امريكا وعند الجوازات اخذ المسؤول منة الجواز وتكلم فى المايك الخاص بالمطار وقال انة مصرى ورفع جواز السفر عاليا اذ بكل المسافرين والعاملين بالمطار يهللون و تسئيف كبير جدا. الحمد للة ان المصرى رجع بكل قوى بعد سنين عجاف جداا من اهدار الكرامة, واللة يهلك كل من كان مسؤول عن اهدارها وتغيبنا عن العالم اجمع , كن فخورا اخى واختى المواطنة فنحن مصريين

تحيييااا مصر

2011-02-11T10:40:00.000-08:00

تحياااا مصر و تحيياا الثورة و يحيااا شعب مصر الى الابد

اللجان الشعبية...من النهاردة احنا الحكومة

2011-02-06T22:48:00.000-08:00

بعد الاحداث التى حدثت بمصر مؤخرا هناك اكيد بعض الخسائر ولكن من المؤكد ان المكاسب عديدةة جدااا , مش هاتكلم فى السياسة لان كل الناس طبعا اتهريت من الكلام و السمع على الفضائيات, لكن الاهم هو تعارف الناس و وقفتهم الموحدة ضد الخارجين عن القانون والحرامية و البلطجية , الناس عرفت بعض علاقاتهم بقيت قوية جداااا رغم انهم جيران من سنين بس محدش يعرف حد من تلاهى الدنيا واكل العيش, تمركزت اللجان الشعبية فى كل مصر لحماية اسرهم و ممتلكاتهم وكلة بيولع نار للتدفئة وكل فترة دوور شاى على اللى قاعدين كل واحد بدورة يوميا, وطبعا الاطفال ما صدقت تمسك شووم اوسنجة او سيف او سكينة علشان يطبقوا اللى بيشفوة فى الافلام واللى بيلعبوة فى البلاى ستيشين, وتتوالى شعارات اللجان من مثلا من النهاردة مفيش حكومة احنا الحكومة , و كلمة قف للتفتيش و كل واحد طلع غلة اللى كان بيحصل لية من الشرطة,هاقلكم موقف شفتة بعينى وهو كنا فى دورية الليل للحماية ولاقينا سيارة جاية علينا طبعا وقفناها , لاقناة بيقول انا ظابط قلنا اخيرا لاقينا حد لسة بيقول انة ظابط شرطة طلبنا منة الكارنية و طبعا كالعادة الغرور خدة حبتين وكلة بحركة راجل واحد طلع الاسلحة وقلنالة اية رايك بقة ان الناس كلها دية عايزة تشوف الكارنية طبعا نفذ الامر بقوة السلاح , وبعد التاكد طلبنا منة النزول وفتح الشنطة قال لية مش اتاكدتوا منى فتم الرد بكل غل علية هو مش انتم لما كنتوا بتقفونا بتطلبوا ننزل و نفتح الشنطة راح سكت وفتحها زى ....وارتحنا كلنا وشفينا غليلنا ههههههههه, الاهم من دة كلة بجد ان مصر ديما فيها رجالة بس وقت الشدة بتظهر بعد ماكنا فقدنا الامل فى مصر وشبابها , تحيا مصر ويحيا شبابها للابد

لماذا؟؟؟؟

2011-01-23T05:17:00.000-08:00

لماذا كل الدول الاسلامية التى لا تتحدث اللغة العربية من الدول المتقدمة و من العالم الاول مثل ماليزيا واندونسيا , والدول الاسلامية التى تتحدث العربية من العالم الثالث اى المتخلفة طبعا كل العرب, اعتقد ان اللغة هى السبب كل كلمة باللغة فى اى موضوع تجد كل شخص يفسرها لمصالحة لكترة موارد اللغة بالمعانى وكل واحد بقى يفسرها بمزاجة ونقعد نتخانق و نشوف مين الصح و نعمل استفتاء مين الصح و مين الغلط ونلف فى ساقية و خلاص. دة حتى فى الاديان سواء مسلم او مسيحى قارنوا العالم المسيحى الشرقى بالعالم الغربى ولاحظوا الفرق , يبقى الفرق فى العقل والمكان وهو الشرق الاوسط التعيس اللى احنا فرحانين بية انة مهد الاديان والحضارة و العراااقة , ياخى بلا نيلة , نتعلم بقى و حرااام كدة, اعلنها صراحة ياريتنى كنت بعيد عن المكان دة, و ابقوا قابللونى لو حصل جديد,مش بردة الناس دية مسلمة وموحدة زينا باللة و بيعبدووة بس هم احسن مننا بمراحل علشان دية ناس بتعبد و تعمل فى نفس الوقت , احنا بقى فاضين للفتاوى و كل ساعة فتوى ضد التانية ودة يقول ودة يعيد و دة يزيد , صدعتوووونا بقى حراااام

التعصب للجميع

2011-01-03T23:22:00.000-08:00

اسمحولى اليوم ان استعير الكلمة المشهورة القراءة للجميع وان اعدل فيها بكلمة اصبحت واقع وهى التعصب للجميع, طبعا دة مش علشان اللى حصل فى الاسكندرية من الارهاب للمسيحين المصرين الذى كانوا مهددين من فترة من جماعات ارهابية خارجية بسبب انهم يريدون ان يمنعوا الحكومة المصرية من تسليم المسيحين الذين اسلموا مرة اخرى للكنيسة لكن كلة بيوصل لبعضة, المهم مش دة موضوعنا الاهم بقى اننا واضح ان كلنا بقينا متعصبين كل لرائية فقط و لا يسمع وجهات نظر او اراء الاخرين, وهذا يحدث فى كل امور حياتنا بداية من الدين و العمل والحياة الاجتماعية حتى الترفيهية زى الرياضة , كل البرامج الرياضية بتتكلم عن عقوبات دة على دة وشتايم دة فى دة و معايرة دول بدول , بجد حاجة بقت تقرف, لازم نفهم و حكومتنا تفهم انها السبب الرئيسى فى كدة , الناس مع الاسف بتطلع اللى جواها على بعض يعنى مش قادرين على الحمار الحكومة طبعا فى بيقدروا على البردعة يعنى الناس على بعض, كل واحد بيطلع الكبت و القرف اللى عايشة فى التانى , لو بصيت للناس تلاقى ان كل واحد مستنى غلطة او اى لمسة علشان يمسك فى اى حد ويطلع اللى جواةة, ةبعد كدة يقولوا وحدة و طنية و اعمال خارجية و الكلام الحامضان دة , لازم يعرفوا ان النفوس اتغيرت و العقول متعصبة والعل و الحقد ظاهر فى كل شىء, مصر زمان مش هى مصر دلوقتى ولا الناس هى الناس مش هانضحك على بعض, لكى الللة يا مصر

عام سعيد

2010-12-29T20:56:00.000-08:00

كل سنة وانتم طيبين و يارب تكون سنة سعيدة

يوم ميلاد ويوم وفاة

2010-12-12T23:25:00.000-08:00

والدى العزيز كم اشتقت اليك, اكتب اليك فى يوم مولدك ويشاء القدر ان يكون الغد يوم وفاتك, يارب اغفر لة وارحمة وادخلة جناتك يارحيم , وارحم كل امواتنا المسلمين , اااامين, كنت خير سند لنا فى الدنيا, ما اصعب الفراق ولكنك فى قلوبنا و عقولنا دائما ,

اول الشتا

2010-12-09T20:18:00.000-08:00

الوقت الضائع

2010-11-29T02:49:00.000-08:00

الكلام اللى هكتبة دة مش اعتراض على القدر و لا النصيب اعوذ باللة , لكنها فضفضة من اللى بيحصلة. ان الواحد بيجيلوا فرص كتير و تكون مميزة جداا ولكن غاليا بتكون فى الوقت الضايع , يعنى حالة حب مميزة لكن صعبة تطور للجواز لظروف معينة , و دية طبعا حصلت لنا جميعا و عيشناها و بنعيشها وبالرغم من تميزها و قوتها و جمالها الا انها للاسف فى الوقت الضائع, وممكن ايضا فرصة عمل تكون فى الوقت الضائع وتندم عليها بعد ذلك, لكن السؤال هنا ان دة قدر و نصيب و لابد من تقبلة؟
ولا دة اختيار للشخص وهو الوحيد اللى يتحمل النتيجة مهما كانت الظروف. هل مصيرنا محدد ام اختيارى؟
اعتقد فى راى انة اختيارى ولكن الاختيار دائما يتوقف على الظروف المحيطة و خبرات الشخص نفسة و رجاحة العقل, و كلها عوامل صعبة وتربك اى شخص فى اتخاذ اى قرار حتى انة من التفكير الكثير يكون الوقت قد نفذ , ويبقى الاختيار فى الوقت الضائع لا جدوى منة

زحمة

2010-11-10T03:50:00.000-08:00

كلمات اغنية اسمها زحمة لفرقة بلاك تيما تدل على واقعنا الحالى ببلدنا العزيزة
عايز رايكم فيها
اسأليني يا حبيبتي ع اللي داير في البلاداللي فيها صادروا حلمي وباعوا صوتي في المزاد اسأليني عن ولاد شفتهم بعنيا دول جربوا كل الحلول وبيفشلوا بالاٍجتهاد احكي ليكي ألف قصة من حكاوي التعبانين اللي عايش نص ميت واللي ميت من سنين اللي نص كلامه كحة واللي شاف خمارة راحها واللي اكل العيش دبحها دايرة دور ع السكرانين
زحمة زحمة زحمة زحمة
اللي نامية وفيها ثروة م الفلوس تعمل جبال واسأليني عن كباري نايمة تحتيها العيال اسأليني ع الغلابة واسأليني ع التقال اسأليني ع الديابة واسأليني ع الفساد اسأليني اشمعنى صابر ع المآسي الملهية أقولك اني كنت واحد م الغلابة الأغبيا اللي صبروا ف انتظار المعجزات والأنبيا واللي فاق من وهمه فجأة لاقى كفر قوم عاد لسة برضه قلبه طاير كعب داير فى البلاد
زحمة زحمة زحمة زحمة

رايحين على فين؟؟؟؟

2010-10-25T00:10:00.000-07:00

اعتقد ان ناس كتير فى بلدنا بتسال السؤال دة, حال البلد و احنا رايحين على فين؟ مع كل اللى عايشينوا و بنعيشوا كل يوم من غلاء اللحمة و السلع الاساسية وقرف المواصلات و الزحمة والامراض اللى كل يوم يتظهرلنا زى الموضة , بقينا لازم كل سنة يطلع لنا كام مرض جديد كدة و خصوصا فى بداية الدراسة , دة غير الاحوال السياسية و الحزبية المنيلة فى كل جوانبها, غير الماكولات والمزروعات المسرطنة , غير مشكلة المياة اللى هاتخلينا فى مجاعة قريبا و احنا ولا هنا , غير الاهانة اللى بيعشها المصرى جوة بلدة و براها حتى الضيوف اللى بيجوا بيضربونا على قفانا ويمشوا معززين ومكرمين و ممكن توصل للقتل و يهرب و عادى كلب و رااح, تحس ان بلدنا دية مالهاش صاحب , فكرنى بفيلم وااسلاماة لما جية قائد التتار ومش لاقى حد يسلمة الرسالة من هولاكو وسال لما احب اكلم الشعب المصرى اكلم مين , تحس انا البلد دية كل مجموعة مع بعض بيتخانقوا على حاجة سواء بقى سياسية او دينية او صناعية او زراعية حتى الرياضة اللى هى المفروض نتمتع بيها كلها قرف , فى بقى رايين فى الحالة اللى احنا فيها دية الاول: بيقول ان البلد دية كدة خلاص و هاتفضل كدة و اللة يرحم الللى فيها , والراى التانى: اللى انا بايدة ان كل الانحدار فى كل المستويات وعلى كل الاصعدة فى بلدنا دة مؤشر ان لازم هايحصل بعدها ثورة فى كل شىء تعيد كل شىء لاصلة و افضل والتاريخ بيقول كدة , بس ليا سؤال لية احنا بس اللى لازم نتفقر و نتطحن و يطلع عنينا و بعدين نتعدل و بعدين نتفقر تانى و بعدين نتعدل وهكذا , احنا بس اللى كدة شوفوا كدة الدول المتقدمة كلة بيسلم للبعدة يكمل و يطور علشان ككدة هانفضل ديما وررررا , وديما كدة احنا ديما بناخدواا....... والحدق يفهم.

دعوة للشذوذ؟؟؟!!!

2010-10-13T23:51:00.000-07:00

الدنيا قامت مرة وحدة فى بعض القنوات الاعلامية وبعض الصحف لية بقى, بسبب اغنية المطرب سامو زين اسمها مالكش دعوة بيا قال اية فيها دعوة للشذوذ , لية بقى قال علشان صحبة فى الاغنية بيقولوا اعتبرنى مراتك علشان يتدرب على رقصة الفرح , علشان قال كدة يبقى دعوة للشذوذ , والنبى فى هبل اكتر من كدة, خلاص هى دية بقت المشكلة فعلا الفاضى يعمل قاضى, اولا دية كلمة عادية جداا و كلنا عارفين و بتحصل بين الشباب و البنات كل يوم كذاا مرة و خصوصا فى الا فراح, دة بنشوفة كتيير لما بنلاقى شباب بترقص رقصة المعروفة باسم رقصة السلوو , بنلاقى ولدين بيرقصوا مع بعض علشان مش ينفع يرقص مع بنت مش يعرفها على الاقل , على كدة احنا كلنا شواااذ من زمان, والبنات بردة بترقص مع بعض ساعات, ياناس حرااام بقى , هى البلد ناقصة هبل و تفاهة, على راى محمد هنيدى جتكم القرف مليتوا البلد, لكى اللى يا مصر

لامتى بقى؟؟!!!

2010-10-04T11:41:00.000-07:00

طبعا كلنا قرينا او شفنا الى حصل فى مبارة الاهلى مع الترجى التونسى, سيبكم من المباراة و الكلام دة , هلى رايتم حالة ضرب عامل الحماية المدنية بكل عنف ووحشية وغباوة و غل, اقسم باللة حسيت انى اخويا و اتعصبت وغضبت جداا ولعنت الكورة واللى عايزنها واللى بيشجعوها , المنظر كان صعب جداا جددااا, ليية كدة سيبك من الجزء دة. السؤال بقى لية ام الامن بيتشطر على اهالينا و على الغير لا, قال اية علشان نحسسهم انهم مش اغراب و فى بيتهم , ياخى اححححة, هنفضل كدة على طووول, ونفسى افهم فين ام الامن و هم شايفين الواد بيتفرم وهم سيبينة , واللة ماليكى حد خلاص , اللى بيبقى باقى عليها كل يوم بيقل وبيكون مش عايزها, انا عارف انى قليت ادبى شويتين بس اعمل اية مش بايدى المنظر كان زى بتوع الاحتلال و هم ماسكين واحد فلسطينى, مش هاقول بقى لو ناس محترمة تستقيل و تمشى لا, هم كلمتين , مفيش فايدة , ولكى اللة يا مصر

عيد سعيد

2010-09-05T00:17:00.000-07:00

كل عام و انت يخير , عيد فطر سعيد عليكمو على الامة الاسلامية

الرجل التانى او التالت او الرابع

2010-08-22T00:40:00.000-07:00

فى جميع مجالات العمل يوجد الرجل التانى اللى بيعمل كل حاجة بس مشكلتة انة مش هو اللى بيظهر فى الصورة , حاجة كدة زى عادل امام فى فيلم طيور الظلام لما كان مع الوزير, مع انة بيكون ادرى الناس بالعمل و نواحية ويكون زكى و سريع التصرف , و فى الاخر اللى ياكل الكريزة اللى على التورتة و كمان التورتة كلها الناس الواجهة الاسامى الاولى بس, وهو يفضل وراء الستار , مع انة لو حصلة حاجة او مرض او غاب الدنيا تقف و تقوم و متقعودتش, نفسى يديونا فرصتنا بقى امتى , بس اللى اكنشفتة اها كلها علاقات و صحبية مدام انت مظبط فوق و كلة تمام يبقى انسسسى يا باشا انك تظهر, الا بقى لو حصل انقلاب ولا اى تغيير جذرى و دة بيبقى صعب قوى علشان كللة مظبط كلة ومش من مصلحتهم حد يطير منهم علشان مش طالبة صداع, ختى لو هو مش كفء و مصايبة كتيرة . نفسى ابقى الاول بقى يارب فى الايام المفترجة دية, بجد تعبت كلة بيطلب و انا اللى اشتغل و هم بهوات واكنهم هم اللى اشتغلوا, كلة على اللة هو السميع البصير

رمضان كريم

2010-08-07T23:59:00.000-07:00

كل عام و انتم جميعا بخير

سنة اولى زواج

2010-07-23T05:58:00.001-07:00

احتفل اليوم مع عيد الثورة المجيد بعيد زواجى المجيد
وكلنا لها

تعلم من تجربة الافيال

2010-06-29T23:06:00.000-07:00

علمت مؤخرا عن خدعة كان يفعلها الانسان لكى يروض الافيال لصالحة ويستغلها وهى راضية و مخدوعة ازاى بقى شوف, كانوا بيحفروا حفرة كبير فى طريق الافيال للبحيرة اللى بيروحوها علشان الشرب او الاستحمام, المهم بيغطوا الحفرة ويقع الفيل و هو متجة للبحيرة, يتجمع علية على مجموعة من الناس و يضربوا فية شوية وبعدين يجى واحد منهم ويدافع عنة و يمشى الناس, الحكاية دية تكرر مرتين تلاتة , وبعدين الراجل البيدافع كل مرة دة ينام جنب الحفرة ولما يجى الفيل الناس تتجمع علشان يضربوة , يروح الفيل مصحى الراجل من النوم علشان عارف انة هو اللى هايحمية , بس من هنا يعرف الراجل دة انة يقدر يروض الفيل و يستغلة فى اعمالة بعد ماوثق فية وافتكرة انة فعلا بيدافع عنة , اية رايكم فى كدة. اكيييد كلنا حصلنا زى الفيل دة و خدنا على قفانا بس ياترى اتعلمنا ولا لسة, حرص و لا تخون والا هاتكون مروض لصالح اشخاص وانت لا تدرى عزيزى

الصييت ولا الغنى؟!؟

2010-06-14T23:47:00.000-07:00

يا ترى انت تفضل اية الصيت وانك متصيت والناس تحبك ويفتكروك ياما هنا وياما هناك وانك مدير وراجل تمام, وانت بتقبض جنيهات ويمكن اقل من اللى فاكرك وبيعاملك كدة, ولا تكون مش بنفس القيمة المعنوية بس يكون معاك فلوس و مرتاح ماديا, ياترى انت تحب تكون انهى فيهم, واعتقد ان كلنا عارفين كلة هايختار اية , بس مع الاسف دية اشياء تفرض عليك و على حياتك, حتى لو قعدت تحاول وتحاول وبردة مش فى فايدة, وانت شايف اللى اقل منك مجهودا و عملا بياخد اكتر منك و انت لاحول لك ولاقوة, هى كلمة بجد حكمة من اسماعيل ياسين فى ناس بتتعب ولا تكسبش وناس بتكسب ولاتتعبش. بينى وبينكم دة صح وواضخ انة من قديم الزمان, والاوضح انة سيستمر الى الاخرة

46 درجة

2010-06-02T22:42:00.000-07:00

ايها السيدات و السادة , احب ان ابشركم اننا داخلين على ايام سودة و منيلة بنيلة, ليس على الوضع السياسى العالمى ولا المحلى فقط انما كمان فى حياتنا اليومية, خبراء الارصاد بيقولوا ان الاسابيع القادمة درجة الحرارة هاتوصل 46درجة ودة هايبقى طبيعى بعد كدة وبيقولك انها هاتاثر على الرقعة الزراعية بنسبة من 88% الى 98 % والارض هاتنشف و مش هاتطرح زرع يعنى مفيش خضارو لا لينا ولا للتصدير, مع اية بقى كمان ان السنة دية مياة الامطار هاتقل اللى بتنزل فى منابع النيل مما سيقلل منسوب المياة, وطبعا مع زيادة الحرارة هاينقطع النور من الضغط, فالباشوات بيطلبوا من الشعب التعود على كدة علشان دة هايبقى الحال بعد كدة, و بيقولا انا الناس تمارس حياتها طبيعى, مع ان اليومين اللى فاتوا لما كانت درجة الحرارة 40 الناس قعدت فى بيوتها و الدنيا كانت فاضية شوية امال بقى لما تبقى 46, يعنى ياجماعة و لا هايبقى فى خضار للاكل و لا مية للشرب ولا حتى نطرى بيها على نفسنا و لا كهرباء للتكيفات, طريقك مسدود مسدود ياولدى

فيلم عسل اسود

2010-05-28T12:58:00.000-07:00

لقد شاهدت فيلم احمد حلمى الجديد عسل اسود, ولازم اللى يشوف الفيلم يكون مركز فى حركاتة علشان ليها معانى قوية عن واقع حال بلدنا دة طبعا غير الافيهات و الكلام, ادعوكم لرؤيتة لانكم سوف ترون الحقيقة لاحوال بلدنا الجميلة, فعلا تجسيد لمصرنا ,الحبيبة اللى مهما بنشوف بردوا مش بنقدر مع الاسف نبعد عنها,فعلا اسم الفيلم على مسمى مما نشعر بة تجاة وطننا فهى فعلا عسل لكن مع الاسف اسود,واللة الواحد مكنش عارف يضحك و لا يحزن على اللى احنا فيية

المعسل سعرة غلىىى؟!!

2010-05-19T05:42:00.000-07:00

بصفتى من هواة الشيشة و المعسل المخلصين, انا اشجب و اندد بارتفاع سعر المعسل اخيررا بقرار من مجلس الشعب علشان الضرايب تكسب, وبردة زودوا سعر السجاير بنسبة 40% والمعسل بنسبة 100% لييية واللة حرام, اطالب كل محبى الشيشة الغالية بوقفة احتجاجية امام مجلس الشعب, بشعار رصيت حجرين على الشيشة

كهربنى شكرااا؟؟؟!!!

2010-05-11T10:05:00.000-07:00

يتم العمل الان بعدادات كهرباء جديدة ديجاتل و تركيبها فى العقارات الجديدة, بنظام كرووت الشحن!!! اة و اللة تجيب كارت شحن وتشحن بية العداد علشان الكهرباء تشتغل.وقبل ما يخلص الشحن تلحق تشحن علشان النور مش يتقطع, اية رايكم؟ وياسلام لو الشحن خلص و انت مش معاك كارت شحن كهرباء, تفضل قاعد فى الضلمة. ياترى طيب وزارة الكهرباء هاتعمل خدمة كهربنى شكرا زى سلفنى او كلمنى شكرا لشركات المحمول, قرارات اخر زمن و افتكاسة جديدة لسرقة اموال الشعب المطحون, وسلمولى على الصيف اللى داخل و التكيفات و المراوح

الف ليلة و ليلة

2010-04-30T22:35:00.000-07:00

قام عدد من المحامين المصرين برفع دعوى للنائب العام علشان اية بقى , علشان يمنعوا كتاب الف ليلة وليلة من السوق و يتم سحبة ليييية بقى علشان الكتاب بيخدش الحيااء؟! تخيلوا بعد مئات السنين المحاميين الجهابذة اكتشفوا ان كتاب الاساطير و الحكاوى بيخدش الحيااء. تفتكروا دية ناس عاقلة ولا خلاص بقم فاضيين للتفاهات دية, ثم حساء اية اللى بيخدشوا, مش عارف اقول ايية بجد,ممكن فى الايام اللى جاية يعملوا دعوى جديدة علشان يمنعوا كارتون توم ااند جيرى و يقولوا بيحرض على العنف و التفكير للدفاع عن النفس دون اللجوء للقضاء,,,,, بس كدة يبقى انت اكيييد فى مصر

غلطة العمر

2010-04-17T07:53:00.000-07:00

هل فعلا اذا غلطت غلطة معينة و مؤثرة بحياتك تبقى غلطة العمر, اعتقد انة صحيح, بالنسبة الى كانت هناك وظيفة فى مقتبل حياتى العملية ولكنها كانت بمحافظة اخرى و كنها كانت رائعة فى المستوى المادى و العملى و متقبلها باهر جدداا, ولكن لقلة خبرة الحياة وبعض من الدلع لا انكر هذا وعدم التعود عن البعد عن الاهل و الاصحاب تركت الفرصة من يدى , و لازلت اندم عليها حتى الان فهى بالمسبة الى غلطة العمر التى لو كنت استمريت بها لما كان هذا حالى الان , ولكن هذا توقع انسانى ولكننا لانعلم الغيب كان من الممكن اذا كنت استمريت لايوجد بها خير لى , و لكنى لازلت اندم عليها, ودية فعلا بالنسبة ليا غلطة عمررى. هل لديك غلطة عمر بحياتك؟
اعتقد جميعنا لدينا

امواج الحياة

2010-04-03T21:08:00.000-07:00

نعيش حياة بها امواج مثل امواج البحر بكل حالتها

انف ابو الهول

2010-03-20T05:30:00.000-07:00

من يومين تم عرض مسرحية احمد ادم حودة كرامة على موجة كوميدى,واثناء المسرحية تم اسقاط سؤال مهم لة ,لماذا ابو الهول و هو رمز مصرى للشموخ و الصمود عندما يتم ترميمة دوريا , لماذا لايتم ترميم انفة المكسور على يد نابليون و الاستعمار؟

هنا فكرت صحيح لية مش بيرممة اننف ابو الهول و يبقى كامل العزة والشموخ, ياترى علشان مبقاش فى عزة و كرامة لينا منذ زمن بعد, ولا ياترى احنا مابنعرفش !!!!! زى حاجات كتير مبتعرفهاش؟؟؟؟

سؤال يفرض نفسة و مش عارف اجابة لة. انتهى

مفارقة الحياة

2010-03-07T22:14:00.000-08:00

من المؤكد ان كثير مننا شعر بهذا الشعور انة سوف يفارق الحياة, ولكن ان تراة بعينك و تشعر بة فعلا هذا هو الشعور الحقيقى و المؤلم فى نفس الوقت, امس شعرت بهذا الشعور فقد استيقظت من النوم وشعرت انى لا استطيع التنفس وضربات قلبى سريعة وحالة من عدم الاتزان, نهضت سريعا لكى اتاكد انى لازلت حى , حالة من الخوف من الموت ومحاولة منى ان اهدىء نفسى و ضربات قلبى بالتنفس العميق ولكن الموضوع استمر حوالى دقيقة, وفى هذة الدقيقة يمر امامك شريط حياتك كلة وماذا سوف يحدث بعد الوفاة من حزن و الم, حقيقتا انا كنت اريد ان ابكى منهذا الشعور خوف من الموت وعدم جاهزيتى لة و لمقابلة الوجة الكريم, وتارة خوف اخرى مما سوف اتركهم خلفى من زوجة و طفل لم ياتى بعد و ام و اخت, شعور حقيقى رهيب لدرجة انى خشيت النوم مرة اخرى حتى لا اموت, وبعد الاستيقاظ من النوم ببركة اللة واتمامة على بنعم الحياة, فكرت وفعلا اقتنعت بالكلام الذى نرددة و لا نقتنع بة انا الدنيا الى زوال ولا يشفع لك الا عملك الصالح, لا صراعات ولا احقاد تنفع فى هذا الموقف, اللهم احسن ختامنا جميعا و خفف مصيبتنا يا ارحم الراحمين

حلاوة المولد

2010-02-24T03:16:00.000-08:00

كل عام و انتم بخير, وناكل الحلاوة واسنانا تسوس كمان وكمان

انبوبة للة يا مصريين

2010-02-11T22:25:00.000-08:00

نفسى افهم حاجة هو لية بلدنا دايما فى ازمة من اى شىء؟ كل كام يوم ازمة فى حاجة مرة عيش ومرة مياة واخيرا

انبوبة البوجاز.وبعدين يعنى هما المسؤولين فى البلد دية بتعمل اية نفسى افهم؟

لييييية

دايما بيكونوا رد فعل,لية مش نكون ناس منظمة والدنيا تمشى صح, بس اقلكم دة طبع فينا نستنى المصيبة و بعدين نشوف و نتحرك , زى معهد الاورام اللى اايل للسقوط و صخرة الدويقة والخ.... مع ان فى الاخر بيتطلع ان الناس كانت عارفة بس مش مهم مدام مش فى حاجة حصلت.اعتقد ان لو مع كل ازمة او مصيبة للبلد المسئول او الوزير يكون عندة دم و يمشى بسببها ماحديش هايكمل 6 شهور اة واللة, علشان كدةانا عندى اقتراح,احنا نعمل عقود للحكومة كل 6 شهور ةاللى يفشل يقال و اللى ماشية معاة نجددلة زى لاعيبة الكورة ههههههههههههه, اةةةةة يابلد عايزة ولد

محترم مع الاسف!؟

2010-02-05T13:34:00.000-08:00

انا بجد تعبت من انى واحد محترم وبيخاف على شعور الناس وبيعاملهم زى ما بحب الناس تعاملنى بس مع الاسف مش بيحصل؟ واضح ان كل الناس بتيجى على اللى بيحترم نفسة و يفتكروة ضعيف. بس المشكلة انى مش عارف اكون غير كدة, اية الحل؟ المحترمين قليليين قوى, وعلشان تكون مسموع و ليك وضعك لازم يبقى صوتك عالى و قليل الادب علشان يعملولك حساب.هو دة اللى انا فية وزادت اوى الايام دية مش عارف اعمل ايية؟ وبردوا مش عارف غير انى اكون نفسى واللى انا اتربيت علية, بجد ان بقيت فى حيرة من امرى, الدنيا كلها عايزة اللى ياخدها بالدراع و الصوت العالى, زى اغنية ام كلثوم انما تاخذ الدنيا غلابا, بس دية الدنيا و امورها لييية الناس كمام بقت كدةة؟
واللة ماعارف اعمل اية اتغير و انزل من نظر نفسى اولا قبل نظرة الناس ليا؟ ولا لازم ابقى بوشين وعلى كل لوون يا بتسطة, حد يقولى اية الصح.؟

خير تعبير

2010-01-30T12:34:00.000-08:00

مفيش كلام يتقال والصورة ابلغ تعبير

هبة من اللة

2010-01-20T22:32:00.000-08:00

احمد اللة انة يعطينى امل جديد بالحياة , وفرحة منتظرة ان شاء اللة انتظرها بفارغ الصبر, الحمد للة

ولازالت الاحوال تزداد غيوما

2010-01-17T22:21:00.000-08:00

لازالت الغيوم مستمرة فى حياتى مع اول العام الجديد ,ولكنى ارى شعاع شمسى يخترق الغيوم, اتمنى بوجود شعاع مثلة فى حياتى يعطينى الامل فى الافضل للايام القادمة, اتمنى ذلك..!

شعورى الحالى

2010-01-10T12:39:00.000-08:00

هذا هو شعورى الحالى وجدت ان الصورة معبرة عنى حاليا هناك بعض الغيوم فى حياتى الحالية,ارجو ان تسطع الشمس قريبا و تنير لى طريقى ,بالاخص طريقى فى الحياة العملية

منظر طبيعى

2009-12-28T22:35:00.000-08:00

منظر طبيعى كلة صفاء و نقاء وجمال الطبيعة البكر, هل يا ترى من الممكن ان نكون نحن مثل هذا النقاء وطبيعتنا البكر كما كنا من قبل, نحتاج ان نحاول لكى نحسن من منظرنا امام انفسنا على الاقل

لماذا لانتعلم من الاخرين؟

2009-12-11T09:33:00.000-08:00

انا دائما اتسائل: لماذا لا نتعلم من الاخرين؟ هل تذكرون الجملة الشهيرة فى فيلم الناصر صلاح الدين عندما قال ريتشارد قلب الا سد: الم تتعلم شىء من العدو بعد. استوقفتنى هذة الكلمة لية احنا مش بنتعلم من اى مكان او شخص متطور و متفوق حتى لو كان عدوا مدام سوف يعود علينا بالنفع؟ اعتقد لاننا لازال نعيش فى مجتمع كل تصرفاتة وارائة ناتجة من افراد فقط وليس من مؤسسات او مجموعات, وبكدة عمرنا ماهانبقى منظمين ولا متقدمين وعارفين كدة و مش بنفذ ولا حتى بنحاول مش عارف ليية, يعنى قدامك السؤال و عارف اجابتة وتختار غلط علشان تستفيد اى نوع من انواع الاستفادة الشخصية التى تصب فى مصلحة ذلك الشخص فقط,ياترى اية الحل لو فكرنا فى الكلام دة هاتلاقية فى جميع مجالات الحياة فى مصر معظمها قرارات فردية وغالبا ماتكون رد فعل يعنى كمان متاخر و مش بيكون ليك السبق. ياناس دة احنا حتى مش بنعرف نكرم رموزنا ولا نظهرهم مش عارف لية, مثلا الكاتب العالمى نجيب محفوظ موقع جوجل اليوم يحتفل بة لوجود احتفالات جوائز نوبل واحنا ولا هنا كبيرنا نعرضلة كام فيلم, والدكتور البرادعى بمجرد اشاعات عن ترشيحة للرئاسة اشاعات رهيبة علية لتشوية السمعة وهو ايضا من اشخصيات العالمية و بردوا حاصل على نوبل, ايية الحل حد يقولى, اللة يرحم سعد باشا لما قال مفيش فايدة فعلا هذا واقع وكل ساعة تؤكد حدوث تلك المقولة,يارب مرة , ننفع فى حاجة تعود علينا بشىء ونتعلم بقى ,ملحوظة صغيرة واكنها تنم عن عقول واعية وتفكيرها سليم: الرئيس اوباما وهو يستلم جائزة نوبل قال فى خطابة انة يعلم انة لايستحق هذة الجائزة لانة لازال فى بداية مشوارة السياسى, شفتة بقى الناس اللى فعلا متقدمة ومش بتخدع نفسها ولا شعوبها, تفتكروا لو حصل هنا كان اية اللى حصل واتقال كان زمنا بنغنى بانجازاتة وارائة و رؤيتة الرائعة وهو لم يكمل العام بعد فى منصبة

شهر ديسمبر

2009-12-04T23:51:00.000-08:00

شهر ديسمبر اصبح منذ حوالى ثلاث اعوام من اهم شهور السنة الى نفسى, طبعا غير موضوع ليلة راس السنة و كدة , انما فى 3 ايام اهم ليا وسبحان اللة ورا بعض و بالترتيب, يوم 13 يوم ميلاد والدى و 14 يوم وفاتة رحمة اللة تتخيلوا هذة المصادفة نحتفل بميلادة واليوم التالى بذكرى رحيلة رحمة اللة, ويوم 15 يوم عيد ميلاد زوجتى, بزمتكم فى حد يفرح و يحزن ويفرح تانى مش دة جناان, مش عارف اقول اية غير انة شهر ديسمبر

كل عام و انتم بخير

2009-11-24T22:32:00.000-08:00

كل عام و انتم بخير و كل عيد اضحى ووقفة عرفات و حج مبرور وكل حاجة حلوة يارب لكل مصر يارب نكون فى احسن حال وسعادة

لماذا؟

2009-11-20T13:34:00.000-08:00

ليية كل اللى حصل دة من الجزائرين؟محديش يقول بعد كدة قومية عربية ولامؤاخذة,انا شفت الموت بعينى,لازم نراجع نفسنا بجد لازم نعرف مين بجد معانا ومين عدونا,كدةةة خلالاص خلصت, انا جالى رسايل منهم بشتيمة كالعادةوتهزيق,بجد ملعون ابو دى عروبة وكلنا عارفين انهم بربر, مش هاتكلم تانى, وتحيا مصر بجد,انا سعيدبتوحد شعب مصر كان مش عندى امل فى بلدنا,بس حقيقى مصر بخير

يارب يامصر

2009-11-12T01:27:00.000-08:00

برغم كل اللى بيحصل فى بلدنا بردة بنحبها ويارررررررررررررب انصرنا يوم السبت ونصعد كاس العالم علشان بجد شعبنا يستحق فرحة وسط اللى بيحصلنا كل فترة كلة يقوول, يااااااارب النصر لمصر

رحمك اللة يا دكتور

2009-10-31T04:52:00.001-07:00

توفى الى رحمة اللة الدكتور مصطفى محمود, هذا المفكر الرائع, انة احد الشخصيات التى اثرت فى شخصيا و فى جيلى ببرنامجة الجميل العلم و الايمان, خلاف كتبة المثمرة الرائعة, رحمة اللة وعسى ان يعوضنا بمفكرين مميزين مثلة, كانت لة مقولة رائعة كنت قراتها لة وهى صحيحي جداا وهى : قيمة الانسان فى الحياة بما اضافة فيها من ولادتة الى مماتة

حال بلدنا

2009-10-22T02:21:00.000-07:00

شوفوا واستمتعوا باحوال بلدنا اللى تضحك و تغيظ فى نفس الوقت, مرسلة اليكم من الحفرة الوحيدة بالعالم من بلدنا

جوانتنامو

2009-10-19T05:31:00.000-07:00

طبعا كلنا عارفين هذا المعتقل الامريكى الشهير بكل ما يتمتع بة من طرق تعذيب رهيبة, من يومين سيدة سعودية اكتشفت ان اسمها على موبيل زوجها جوانتنامو, تخيلوا تفتكروا الست دية كانت بتعمل اية فى زوجها ولا هو اللى كان بيفترى عليها بالاسم دة, المهم الست اطلقت من زوجها بسبب الاسم دة , وكويس ان فى حد بيعرف يخرج من المعتقل دة اليومين دووول, عقبالناا يارب

هيئة سكك حديد مصر

2009-10-13T06:32:00.000-07:00

طبعا كلنا فاكرين اعلانات هيئة سكك حديد مصر اللى خنقونا بيها فى رمضان علشان التزويغ من التذاكر والتخريب والكلام دة, امس كان هناك قطار يخرج من الاسكندرية الى القاهرة الساعة 9 مساء, وصل القطار الى القاهرة الساعة 6 صباحا يعنى 9 ساعات سفر من هناك الى هنا, ليية بقى فى عربية حصل فيها عطل فارسلوا لها جرار علشان يشدها راح الجرار عطل, راحو ارسلوا جرار تانى بردة عطل, راحو ارسلوا جرار تالت من باب التفائل ان التالتة تابتة راااح اية عطل, اربع جرارات علشان يجروا عربية, هى دية سكك حديد مصر ودية حكومة مصر وهيئاتها, الشىء الجميل ان ركاب القطار اول ما وصلوا عملوا 70 بلاغ ضدد الهيئة يعنى الحمد للة لسة فى امل فى الشعب بس الحكومة اعتقد لا, وسلمولى على الاعلانات للهيئات والوزارات

لقاء حفيد الزعيم عبد الناصر

2009-09-29T23:21:00.000-07:00

شاهدت امس بقناة الحياة لقاء بحفيد الزعيم عبد الناصر لذكرى وفاتة, وهذا الحفيد هو ابن المليونير المعروف ورجل المستحيل فعلا لمصر اشرف مروان الذى قتل منذ عامين, طبعا لايوجد خلاف على الزعيم عبد اناصر ولا على اشرف مروان من عظمتهم وخدمتهم لوطنهم ولكن فعلا هذا الرجل احمد مروان ينطبق علية قول هذا الشبل من ذلك الاسد, تخيل بقى انى كمان حفيد عبد الناصر وهو بة تشابة فى ملامح الوجة من الزعيم الراحل, مدى الفخر الذى هو فية لانة حفيدة وقدرتة الرائعة على الكلام والهدوء والرزينة والقوة ايضا تدل انة تربى فى بيئة ناصرية فعلا, ياريت كانت بلدنا فيها حد زية ولا حتى ربعة, حقيقى تحية لة ولابية العظيم اشرف مروان الذى اغتيل من جهات معادية معروفة, والتحية الاكبر لزعيم الامة العربية وكرامتها وعزها ومن اعظم زعماء العالم فى القرن العشريت طبقا لتقرير جريدة واشنطن بوست الامريكية انة من اهم زعماء القرن الماضى فى العالم, اللة يرحمة حقيقى

ليلة وقفة العيد

2009-09-20T10:19:00.000-07:00

صور لاخر يوم رمضان ووقفة العيد بالمدينة الساحرة دائما الاسكندرية بغروبها الجميل وليلها الساحر

المسؤولية

2009-09-06T04:41:00.000-07:00

كم هو جميل ان تكون مسئول, تختلف حجم المسؤولية عن ما انت مسؤول عنة لكنة احساس رائع ويعطيك القوة والثقة بالنفس وايضا نضج بالعقل والشخصية مهما كانت نوع المسؤولية وحجمها, فهى تكسبك الكثير من الخبرات الحياتية اللازمة ويتفتح عقلك على امور لم تكن تدركها من قبل وتجعلك فى حالة مثيرة من التزود بمعرفتها واكتشافها وكلما تخطو فيها خطوة لكى تعرف الجديد يكون بنفس مقدارها يتم ثقل شخصيتك ونضجها, بالرغم من متاعبها التى لابد ان تصاحبها من اعصاب متوترة وقلق, الا انها جميلة واحساسها رائع ويشعرك بالقوة وبقدرتك على الخوض فى الحياة بخطى ثابتة

رمضااان جانا

2009-08-19T22:38:00.000-07:00

كل عام وانتم بخير جميعا وبصحة وسعادة وفى رضا ربنا كلنا نتسابق فى الشهر الكريم

الوحدة الوطنية

2009-08-16T22:16:00.000-07:00

كل شوية نلاقى على الفضائيات اقباط المهجر يقولوا ان فى تفرقة و كلام كبير والفضائيات مابتصدق تلاقى اى خناقة ما بين مسلم و مسيحى وتلاقيها شعللت ونداءاات لامريكا وكلام غريب قوى علينا, واللة ياجماعة كل دوول ناس صحبة مصلحة وغالبا بتكون شخصية ليهم, حرام اللى بيحصل دة الناس بداءت تتاثر وتشيل من بعض, بس ارجع واقول اننا بردوا مش قوى كدة ومفيش تفرقة قوى كدة غير للناس اللى بتتلكك وعايزة تعمل مشاكل وكل اللى بيحصل من مشاكل دية من اللى بيشوفوة ولعب فى الدمااغ, يعنى مثلا عندى فى الشركة فى المواسم الاسلامية الخالصة الشركة بتوزع ياميش رمضان وكحك ولحمة العيد وحلاوة المولد النبوى لكلة, مش بتفرق بين دة و دة وهو دة الطبيعى بتاعنا, ارحموناا بقا هى مش ناقصة عايزين نتقدم ابووس ايديكم

انا المديير

2009-08-09T22:31:00.000-07:00

الحمد للة واضح ان الجواز وشة حلو عليا وربنا كرمنى وبقيت اناااا المديير, زى فيلم فؤاد المهندس لما كان اسمة السبعاوى طة وبقيييت انا المدير, ربنا يسترها معايا واكون على قدر المسؤولية ادعولى ياجماعة, يااارب

عيد ميلادى

2009-08-02T05:24:00.000-07:00

النهاردة عيد ميلادى ال 30 اول عيد ميلاد ليا وانا متجوز بينى وبينكم احساس جميل وجديد بس ربنا يستر فى باقى السنين, انا دخلت فيلم احمد حلمى الجديد وكالعادة عجبنى فكرتة حتى لو مقتبسة, وحكمة الفيلم معناها جميل وهى ان تعيش غائبا حاضرا افضل من ان تكون حاضرا غائبا, وكل سنة و انتم طيبيين

هاتجوووووووووووووز

2009-07-21T13:19:00.000-07:00

انا بكتبلكم اخر بوست فى حياة العزوبية قبل جوازى يوم الخميس, وهادخل القفص زى مابيقولو, ارجوكم اللى معاة مفتاح للقفص عايز منة نسخة, قوييينا يارب

برامج واحد من الناس

2009-07-17T10:39:00.000-07:00

انا مضطر اخرج من حالة التركيز فى الجواز مع انة مش باقى غير 5 ايام ولكن, انا متابع جيد للبرامج الحوارية و من فترة تابعت برنامج واحد من الناس بغض النظر عن حب الناس للمذيع ولا لا بس اكتشفت ان بلدنا ديية ملياانة بلاوى والناس فيها لاتعرف معنى العيشة الكريمة, انا كل يوم خميس بقيت بدل ما اتفسح فى الوييك اند بقيت اشيل الهم من اللى بشوفة و من التفكير ليية احنا كدة, وياترى بعد كل سنين التدهور فى كل شىء فى بلدنا ممكن تتصلح طبعا مش ,انا بجد بقولها بصوت عالى و انا المفروض داخل حياة جديدة ربنا يستر عليا فيها و يقدرنى عليها,انا اعلنها انا يااااس جدااا من احوال بلدنا وواللة ماهتتعدل, كل مافكر و افتكر تاريخ مصر دايما فى مشاكل اجتماعية وغيرها من ايام الملك وبعد الثورة,وحتى يومنا هذا فى الالفية الجديدة مفيش جديد , برغم كل دة شعبنا مميز جدا سواء اشخاص عالميين او قدرة على العمل, بس بردة نفسى نعيش مرتاحيين, انا بجد كل ما اتفرج لازم ادمع, بس فى نفس الوقت احمد ربنا على اللى انا فية ومش بسببى كل دة بفضل ربنا وابويا وامى,واخاف جداا واقول اكييد فى وقتنا دة مش هاقدر اعمل نص اللى عملوة ليا لى اولادى, ما علينا انا هاسيب الكابة و اروح افرح نفسى اشعر انى عريس, دعوااااتكم

الجواز وسنينة

2009-07-05T22:31:00.000-07:00

ازيكم ياجماعة واللة وحشينى جداا, بس مكنتش قادر اكتب اى شىء من الضغوط اللى عليا للتجهيز للجواز ولزومة,حاجة بجد تجيب احباط وتزهق الواحد من الجواز واللى عايز يتجوز.واللى يغيظك بقى كل واحد يعرض عليك المساعدة والكلام دة بس طبعا عزومة مراكبية ماعدا القليل منهم اللى يعتمد عليهم الحقيقة بس بجد الموضوع دة عامل زى بلدنا كلة عايز يفرح وبس من غير اى مشاركة حقيقية كلة على الجاهز, احنا كدة فى مصر نحب غيرنا اللى يتعب واحنا اللى نظهر بعد كدة على الجاهز, انا بجد حاسيس ان الناس فى بلدنا دية كلة بيمصلح على كلة وحاجة صعبة قوى ربنا يسترها بجد علينا, وادعولى ربنا يقوينى واخلص فى ميعادى, بالقى من الزمن 16 يوم تفتكروا الحق؟ يامسهل

دايما صوتنا عالى

2009-06-22T22:49:00.000-07:00

انا طبعا مش هاتكلم عن المشكلة اللى حصلت للمنتخب مع عمرو اديب علشان كلة اتكلم عنها واللى اتقال اتقال وكلنا عارفينة. لكن المهم ان احنا كشعب مصر دايما صوتنا عالى عمال على بطال فى الحق والباطل, من الاخر كدة بنهيص مع الهيصة سواء فرحة نفرح اووى ونبقى مفيش حد زينا ولاقدنا والحزن والغضب نبقى فى اسفل سافلين من الحزن والغضب وكلة يطلع يقول اللى مش ممكن يتقال من ناس المفروض انها عاقلة وبتفهم, يا جماعة لازم نبقى موضوعيين بقى دة, وصانا سيدنا محمد (صلى اللة علية وسلم) بان خير الامور الوسط, يعنى كلة بالمعقول سواء فرح او غضب, يارب نفهم بقى ونتعلم علشان نستحق اننا نتقدم ونعرف نتعلم من بعض وعلى الاقل نسمع بعض مش كلة صوت عالى ومحديش بيسمع حد, حراام بقى كفاااية

انت مصرى

2009-06-18T15:24:00.000-07:00

لية دايما المصرى يظهر بس فى الاوقات الصعبة وبمزاجة لما يحب يعمل حاجة بيعملها , لية مش يبقى دايما , بس هو دة المصرى اللى يكون عايزة بيعملوة, نفسى نكون دايما جد على طوول فى كل المجالات ونرفع راس مصر بلدنا ونكون احسن ناس, تحية من القلب الى كل المصريين وبلدنا الحبيبة افخر يا مصرى انك من مصر,مبرووك شرفتونا ورفعتوا راسنا عالميا, ويارب تكمل فرحتنا بوصولنا لكاس العالم بقى يارررررب

قاال كاس عالم قاااال

2009-06-08T04:17:00.000-07:00

واللة ياجدعان مالناش فيها احنا احسن ناس تتشطرعلى بعضيها و بس و نعاير بعض و نغيظ فى بعض, وساعة الجد كلة بيضيع زى الزبدة لما يطلع عليها النهار تسيح, احنا اجدع ناس تتفرج وتتكلم بس مافييش افعال, نحن قوم اقوال لا افعااال كالعادة, وسلملى على كاس العالم,رااااحتتتت,اشوفكم فى تصفيات 2014 وربنا يدينا ويديكم طولة العمر ويلهمنا الصبر

هل هو رئيس فيلسوف ومفكر؟

2009-06-04T04:33:00.000-07:00

فى خطاب الرئيس الامريكى بمصر الذى كان ممتعا ومتفائلا بعالم جديد وليس كالخطابات السياسية المعروفة انة فعلا رئيس مختلف فى وقت نحتاجة عالميا , لفت نظرى كلمة فى خطابة وهى كلمة معناها جميل جدا وهى طبيعية ولكننا لانعمل بها والكلمة هى عامل الاخرين كما تريد ان يعاملوك فعلا لو ركزنا بالكلمة نجد انها لو تم العمل بها لن نرى اى مشاكل فى حياتنا ولابد منالعمل بها وتعميمها لاننا نحتاجها جدااا فى دنيانا المليئة بالصعاب, اخيرا انة رئيس ذو كاريزما رائعة وعقلية رائعة ولكنى اعتقد انة جاء فى وقت صعب على العالم اجمع من ازمات واوبئة, اتمنى ان نتعلم من كلماتة والعمل بها, حقيقة اول رئيس امريكى احبة من اول مرة, انة فعلا مفكرو فيلسوف