اخوانى واخواتى المصريين

الايام اللى فاتت وضحت لينا اننا لا عندنا رئاسة ولا حكومة ولا احزاب ولا معارضة و اى فكر.فى وقت كلة مصايب كهرباء فاشلة ومضلمة علينا و نيل هايروح مننا ومفيش سولار ولا بنزين والتموين هايخلص ومفيش سياحة ولا استثمار ولا انتاج,مش معقول بلد زى مصر مفيهاش حد يمسكها صح سواء  اخوان بقى معارضة جن ازرق كلة ضاااايع واحنا وراااهم,لسة من شوية كان فى جلسة بين الشاطر وايمن نور و عمرو موسى فى بيت ايمن نور, بزمتكم حديتوقع او يفهم اية اللى بيحصل فينا دة والناس هى هى مش بتتغير احنا بس اللى بنتفقع, نسالكم الدعاء ويارب منقلش قريبا اقروا الفاتحة على مصر

فيلم قديم بنسخة جديدة

اللى بيحصل فى بلدنا عامل زى الافلام العربى و الهندى القديمة, سيناريو واحد اساسى مع تغيير فى الابطال وحبة احداث لزووم الساسبينس. حالنا هو هو ومش هايتغيير نفس المواضيع بتتكرر باساليب جديدة وابطال جديدة حسب الوقت اللى احنا فيية, ريحوا الدماغ و كلة يركز فى حاجتة عشان يعرف يعيش, وسلملى على الثورة و الديموقراطية اللى بنسمع عنها بس و بنشوفها فى الافلام الاجنبى , بس احنا بقى افلالام عربى ام الاجنبى ههههههه

صورة على الطريق

صورة على الطريق ساعة مغربية

تسليم اهالى على المفتاح

 

الايام ديية بيتكلموا عن الدورى المصرى لكرة القدم اللى هايبداء فى 22 اغسطس انة يبقى حصرى لقناة معينة و هى اللى تبيع للكل بعد كدة, وكان معروف من زمااان ان حق الاشارة بتاعة اذاعة الماتشات من حق التلفزيون المصرى فقط وهو اللى يبيعها. لو حصل بقى والقناة خدت الحق الحصرى يبقى الاشارة دية هاتبقى منها هى يعنى التلفزيون مش هايملك شىء ولو عايز يذيع لازم يشترى, لية بقى كل الكلالام دة عشان اتعرف ان الجزيرة رياضة مصر هى اللى عايزة تشترى الموضوع دة واللى صدفة هاتبداء البث بتاعها من 1 اغسطس. بردوا كل دة مش مهم, انما لو فعلا حصل فى ظل وزير اخوانى لللاعلام وكدة وعلاقة الاخوان بقطر ( الجزيرة ) ولو فعلا تم البيع الحصرى ليها , يبقى تم التفريط فى حق المواطن الغلبان فى متعتة اللى احتمال يتحرم منها زى حجات كتير اتحرم منها, دة معناة ان مصر بتتسلم تسليم اهالى على المفتاااح زى ما كل الناس بتقوول.وسلملى على الاشاارة

الشخص الالة ؟

كتير مننا بيتعاملوا مع الاشخاص اكنهم الة , ويعتقدوا فيية اوى اكنة هو و مفيش غيرة واى حد تانى او راى حد تانى هو دة وبس  اللى صح, والباقى كلة كفرة ولاد كلب او مش صح, دية مشكلتنا فى شعبنا عشاان نصة جاهل اكييد وكمان عشان مش بنشغل عقولنا و دة الاهم, لازم ديما نبقى تبع حد و خلاص وهو اللى يسوق , انما نفكر او كدة مالناش فيية, ونشتم بعض ونقاتل بعض عشان اشخاص عملناهم الة , واحنا مش فاهميين, دة مش فى السياسة و بس على فكرة فى كل شىء  فى الحياة دوور وانت تلاقى حتى فى الحب شايف اللى بتحبة و بس مع انك لو شفت حد تانى ممكن جدا يبقى افضل, لكن نحن اصحاب بصيرة عمياء لا نعرف كيف نبصر ولا نفهم. خلص الكلام

الانسان المحظوظ؟

مين هو الانسان المحظوظ يا ترى؟ اللى معاة فلوس ولا اللى حوالية ناس بيهتموا بية ويحبوة من غير سبب ولا الناجح فى عملة, كل واحد لية مفهومة عن الانسان المحظوظ. امى ديما تدعيلى دعوة  ان ربنا يحميك ويحبب فيك خلقة اكييد كلنا بنتمنى دة, لكن مش بالتمنى ولا الدعاء فقط يحصل دة انما الشخص نفسة وبافعالة وطبعا رضى الرب و الوالدين هم اللى بيحققوا الدعوة دية, الانسان يجتهد فقط والدعاء مكمل لة, ربنا مايحرمنى من حب الخلق ليا ابدااا, لان بيية اكييد هابقى محظوظ وهاحقق كل اللى نفسى فية, يااارب

مادة 37 من القانون

تم امس اصدار قرار من النيابة بتفعيل القانون رقم 37 اللى هو كان اصلا موجود بس مش معروف اوى او مش مفعل,اللى بيقول اية بقى  ان من حق اى مواطن يقبض على اى حد بيسرق او بيخرب او بيعمل اى شىء ضد القانون حلو كدة, طيب  لما يتمسك هايروح فيين يا ترى للشرطة اللى مش شغالة ولا كل واحد بقى يعاقبة بمزاجة, زى ما حصل فى السويس كدة والشاب اللى مات مع خطيبتة, من الاخر كدة دة معمول عشان كل حد يعمل الميلشيات بقى والامر بالمعروف وكل الكلام الجميل دة وكل يأأدب كلة او يبلطج على كلة بس بالقانون, ايها السادة المواطنون استعدوا للحرب الاهلية