الزمن والصياااعه

الزمن هو الفيصل فى الحكم على الاحداث والقرارات و الوعود والخطط وايضا على الاشخاص,كلنا حكمنا على الاخوان وحكمهم بالغباء والاستغلال والخيانة وكل شىء زفت ,ودة صحيح طبعا مننكرش , وكلامهم اللى كان مجرد مايتقال محديش  يقبله ويحصل هجوم عليه مع ان الواحد لو فكر فيه هايلاقيه صح وواقعى بس الاشخاص مش مقبولين ولا طريقتهم مقبوله عشان كدة مكروهين واى شىء من عندهم يبقى زفت وسوااد, تمام كدة .نيجى بقى للكلام دلوقتى اللى هو من الاخر نفس كلام الاخوان بس الفرق فى حاجه وحده بس الصياعه فى العرض و اخباره للناس بطريقه كلها حب واهتمام مش بالصدمه ,ودة اللى كان نفس الحال فى ايام مبارك تاخد على قفاك وانت فاشخ ضبك وبتضحك عشان السم موجود بس جوه العسل, دلوقتى النور يقطع نقول عادى معلش, اضرابات و مظاهرات مش وقته عشان البلد تقوم , حوادث طرق وفساد ونقول معلش هنطهر , الحال واحد والله , بس الصايع هو اللى بيكسب فى البلد دية مش الصريح واللى يجيبهالك فى وشك , اصل احنا حساسين مش بتوع الواقع ظبطنى ااه وادينى على قفايا بس و انا راضى وضاحك عليا , والله ما هنتغير و طول ما احنا كدة لا هتلاقى شرف ولا عمل ولا قوه ولا انتاج وقريبا لا دوله

متى نكون فعل وليس رد فعل؟

امتى بقى نعرف نخطط وننفذ لسنين و اجيال قدااام, مرة نبقى فعل مش كلة رد فعل من اول ماوعينا على الدنياا, نفسى نبقى حضارة بجد زى زمان فى العصور المختلفة, متى يكون هذا اليوم ياترى؟؟؟

دائما هناك الاوووسخ

وانا مع صديقى مستنية على القهوة وبنتكلم عن البلد واللى فيها, وبالرغم انة مش مع الاخوان ولا مع الجيش لكن خايف على البلد و بس, المهم لاقيتة بيقولى رغم كل دة بس انا متفااائل, وقعت على نفسى من الضحك حتى لاااى الشيشة وقع منى من قوة الضحك, سالتة متفائل لية؟ قالى عشان مفيش ولا العن ولا اوسخ من كدة اللى احنا فية, تبسمتلة وقلت لة كلمة وحدة الكلمة دية بنسمعها من معارفنا و قرايبنا وكل اللى نعرفة من اول ما اتولدنا لحد دلوقتى, ياعزيزى انت فى مصر فدائما هنااك الاووسخ

الوضع الاخواانى

الوضع الاخوانى الحالى فى مصر معروف وشايفين اللى بيحصل, وفى تونس المشكلة اكبر بكتير لان الحكام اللى هم الاخوان معاهم الجيش والشرطة ضد الشعب, فى ليبيا الوضع انيل عشان ليبيا اصلا كل اهلها مسلحيين, دة غير القلق اللى فى تركيا, دة  معناة ايه ان الفكر الفاشل ليهم واحد والعنف اساس حياه ومبداء وقت اللزوم, يبقى الوضع معروف للكل الا ليهم هم او اللى تبعهم بس , لو على اننا كفرة يبقى ايه اللى يخليك تحكم بلد كلها كفرة مابلاد الله واسعه والكفر فيها على اصلة زى مابيقولوا, خلاصة القول على مر السنين والتاريخ اللى بيروح عمروا مابيرجع لو تعرف ترجع عمرك دقيقة ورا , ساعتها اصدق انة هايرجع, دة عندهاا , ليا سؤال لية الناس دية مكروها كدة من كل الشعوب دية؟ , ولا كلنا غلط و كفره وهم الصح وبس . 

البنزين و السولار اتنين فى واحد

طبعا كلنا شايفين و حاسين بازمة البنزين و السولار والزحمة ووقف الحال, كل الناس قرفانة و زهقانة بس انا مبسوط, ليية بقى عشان زمان كان ديما الازمة بتكون على ناس اة و ناس لا خصوصا الناس الغلابة, لكن دلوقتى كلة حاسيس و متاثر, عشان كلة بجد يتحرك ويبقى مفيد مش هتافات و كلام بس, كدة كلة معكوك بقى جمااعة يعنى, المساواة فى الظلم عدل, مش ناس و ناس, هنشوف بقى هنتصرف ازاى ولا لو اتحلت هننسى و نطنش كالعادة, كان لازم عشان نحس و نتجمع عشان نغير يكون كلنا متاثريين بجد سواء بنزين او سولار او كهرباء و مياة, هنشوف هايحصل ايية

اخوانى واخواتى المصريين

الايام اللى فاتت وضحت لينا اننا لا عندنا رئاسة ولا حكومة ولا احزاب ولا معارضة و اى فكر.فى وقت كلة مصايب كهرباء فاشلة ومضلمة علينا و نيل هايروح مننا ومفيش سولار ولا بنزين والتموين هايخلص ومفيش سياحة ولا استثمار ولا انتاج,مش معقول بلد زى مصر مفيهاش حد يمسكها صح سواء  اخوان بقى معارضة جن ازرق كلة ضاااايع واحنا وراااهم,لسة من شوية كان فى جلسة بين الشاطر وايمن نور و عمرو موسى فى بيت ايمن نور, بزمتكم حديتوقع او يفهم اية اللى بيحصل فينا دة والناس هى هى مش بتتغير احنا بس اللى بنتفقع, نسالكم الدعاء ويارب منقلش قريبا اقروا الفاتحة على مصر

فيلم قديم بنسخة جديدة

اللى بيحصل فى بلدنا عامل زى الافلام العربى و الهندى القديمة, سيناريو واحد اساسى مع تغيير فى الابطال وحبة احداث لزووم الساسبينس. حالنا هو هو ومش هايتغيير نفس المواضيع بتتكرر باساليب جديدة وابطال جديدة حسب الوقت اللى احنا فيية, ريحوا الدماغ و كلة يركز فى حاجتة عشان يعرف يعيش, وسلملى على الثورة و الديموقراطية اللى بنسمع عنها بس و بنشوفها فى الافلام الاجنبى , بس احنا بقى افلالام عربى ام الاجنبى ههههههه