الامم صاحبه التاريخ

لماذا الامم و الدول صاحبه التاريخ العريق والاثار, لا تكون من الدول المتقدمه مثل مصر واليونان والصين والهند , ودائما يوجد مشاكل عرقيه و دينيه واجتماعيه وسياسيه واقتصاديه ... الخ , مع العلم ان الصين و الهند ليسوا دول عالم اول بل مازالوا عالم ثالث فهم ليسوا المانيا او اليابان او اميركا , ممكن لديهم صناعات ويحاولون ان يكونوا منهم ولكن ليس بعد , السؤال لماذا تلك الامم ليست متقدمه كدول العالم الاول , مع العلم ان الشىء المشترك بينهم هو التاريخ العظيم  والمبهر بكل المقايس و التقدم حينها وليس مثل دول العالم الاول التى لا تمتلك جزء من تلك الحضارات القديمة المبهره وانما تمتلك  المستقبل المبهر والقوى. حقا لماذا؟

انا وفريده

امس كانت لدى وعكه صحيه, فانفردت بنفسى بعيداا عن زوجتى وابنتى, وبعد قليل قامت ابنتى تبحث عنى ثم سالتنى , فيك ايه ياكريم  قلتلها مفيش يا حبيبتى, انت تعبان قلتلها اه شويه , قالتلى ليه انا مش عايزاك تتعب , وبدات فى الاحضان والبكاء لتعبى , والله وقتها اتمنيت الزمن يفضل وااقف فى لحظه الاحساس ديه اللى مش ممكن تتوصف  والفريد من نوعه من ابنتى فريده , ونامت جنبى عشان متعبش تاانى

الالم والجرح

بلاشك ان الالم والجرح يضفيان الحزن والاسى وايضا فى بعض الاحيان الرغبه فى اعتزال الحياه, واحيانا يكون دافع للافضل ويكون معلما جيدا للشخص , كل ذلك يعتمد على ايمان وشخصيه الشخص والقدره العقليه الخاصه به

الزمن والصياااعه

الزمن هو الفيصل فى الحكم على الاحداث والقرارات و الوعود والخطط وايضا على الاشخاص,كلنا حكمنا على الاخوان وحكمهم بالغباء والاستغلال والخيانة وكل شىء زفت ,ودة صحيح طبعا مننكرش , وكلامهم اللى كان مجرد مايتقال محديش  يقبله ويحصل هجوم عليه مع ان الواحد لو فكر فيه هايلاقيه صح وواقعى بس الاشخاص مش مقبولين ولا طريقتهم مقبوله عشان كدة مكروهين واى شىء من عندهم يبقى زفت وسوااد, تمام كدة .نيجى بقى للكلام دلوقتى اللى هو من الاخر نفس كلام الاخوان بس الفرق فى حاجه وحده بس الصياعه فى العرض و اخباره للناس بطريقه كلها حب واهتمام مش بالصدمه ,ودة اللى كان نفس الحال فى ايام مبارك تاخد على قفاك وانت فاشخ ضبك وبتضحك عشان السم موجود بس جوه العسل, دلوقتى النور يقطع نقول عادى معلش, اضرابات و مظاهرات مش وقته عشان البلد تقوم , حوادث طرق وفساد ونقول معلش هنطهر , الحال واحد والله , بس الصايع هو اللى بيكسب فى البلد دية مش الصريح واللى يجيبهالك فى وشك , اصل احنا حساسين مش بتوع الواقع ظبطنى ااه وادينى على قفايا بس و انا راضى وضاحك عليا , والله ما هنتغير و طول ما احنا كدة لا هتلاقى شرف ولا عمل ولا قوه ولا انتاج وقريبا لا دوله

متى نكون فعل وليس رد فعل؟

امتى بقى نعرف نخطط وننفذ لسنين و اجيال قدااام, مرة نبقى فعل مش كلة رد فعل من اول ماوعينا على الدنياا, نفسى نبقى حضارة بجد زى زمان فى العصور المختلفة, متى يكون هذا اليوم ياترى؟؟؟

دائما هناك الاوووسخ

وانا مع صديقى مستنية على القهوة وبنتكلم عن البلد واللى فيها, وبالرغم انة مش مع الاخوان ولا مع الجيش لكن خايف على البلد و بس, المهم لاقيتة بيقولى رغم كل دة بس انا متفااائل, وقعت على نفسى من الضحك حتى لاااى الشيشة وقع منى من قوة الضحك, سالتة متفائل لية؟ قالى عشان مفيش ولا العن ولا اوسخ من كدة اللى احنا فية, تبسمتلة وقلت لة كلمة وحدة الكلمة دية بنسمعها من معارفنا و قرايبنا وكل اللى نعرفة من اول ما اتولدنا لحد دلوقتى, ياعزيزى انت فى مصر فدائما هنااك الاووسخ

الوضع الاخواانى

الوضع الاخوانى الحالى فى مصر معروف وشايفين اللى بيحصل, وفى تونس المشكلة اكبر بكتير لان الحكام اللى هم الاخوان معاهم الجيش والشرطة ضد الشعب, فى ليبيا الوضع انيل عشان ليبيا اصلا كل اهلها مسلحيين, دة غير القلق اللى فى تركيا, دة  معناة ايه ان الفكر الفاشل ليهم واحد والعنف اساس حياه ومبداء وقت اللزوم, يبقى الوضع معروف للكل الا ليهم هم او اللى تبعهم بس , لو على اننا كفرة يبقى ايه اللى يخليك تحكم بلد كلها كفرة مابلاد الله واسعه والكفر فيها على اصلة زى مابيقولوا, خلاصة القول على مر السنين والتاريخ اللى بيروح عمروا مابيرجع لو تعرف ترجع عمرك دقيقة ورا , ساعتها اصدق انة هايرجع, دة عندهاا , ليا سؤال لية الناس دية مكروها كدة من كل الشعوب دية؟ , ولا كلنا غلط و كفره وهم الصح وبس .