انا طبعا مش هاتكلم عن المشكلة اللى حصلت للمنتخب مع عمرو اديب علشان كلة اتكلم عنها واللى اتقال اتقال وكلنا عارفينة. لكن المهم ان احنا كشعب مصر دايما صوتنا عالى عمال على بطال فى الحق والباطل, من الاخر كدة بنهيص مع الهيصة سواء فرحة نفرح اووى ونبقى مفيش حد زينا ولاقدنا والحزن والغضب نبقى فى اسفل سافلين من الحزن والغضب وكلة يطلع يقول اللى مش ممكن يتقال من ناس المفروض انها عاقلة وبتفهم, يا جماعة لازم نبقى موضوعيين بقى دة, وصانا سيدنا محمد (صلى اللة علية وسلم) بان خير الامور الوسط, يعنى كلة بالمعقول سواء فرح او غضب, يارب نفهم بقى ونتعلم علشان نستحق اننا نتقدم ونعرف نتعلم من بعض وعلى الاقل نسمع بعض مش كلة صوت عالى ومحديش بيسمع حد, حراام بقى كفاااية
13 comments:
احنا كدا على طول ياما نفوز باستمرار يا اما ورا الخسارة كل ماهو غير اخلاقي من غير حتى ما نتأكد اذا كان صح ولالاء عيب والله فى حقنا وفى حق اعلامنا وخصوصا اذا كان حد كبير وليه اللي بيسمعه ويشوفه ده ربنا قال نتأكد الاول "اذا جاءكم فاسق بنبأ فتبينوا" نتأكد وبعدين نعمل اللي عايزينه ونحاسب ، تحياتي ليك يا كريم على مواكبة الاحداث بصفة مستمرة
يانشوى اشكرك بس دة اللى لازم يحصل بقى عايزين نحس بقى اننا بنتقدم زهقنا بقى كفاية كدة, ولا هانقضيها فرجة على العالم من حوالنا فى كل حاجة, دة حتى الكورة مش فالحيين
ليك حق
بدل ما نعلى صوتنا ونتخانق الاولى نشوف سبب المشكلة وندور على حل
تحياتى
عمرو اعتذر
ومبروك الصلح
اولا هوة الشعب المصرى كدة فى الكورة
لما اى فريق يفوز يفرحوا ويتجلوا اوى ويعظموا فى الفريق اى ان كان اهلى او زمالك او منتخب ولما يخسر ينهاروا على الفريق ويشتموا ويحملوه كل المسئوليه
ثانيا وبمناسبه المشكله اللى تعرض ليها المنتخب لازم كلنا نرفض ان احنا نسمع ليها اصلا ونتاكد انها وشايه لغرض ولهدف
دة كلام غير مقنع تماما
وادى ظهرت الحقيقه وعلى الهوا بردو فى برنامج البيت بيتك اول امبارح
تحياتى
عزيزتى ميرا انا مش بقول على الكورة وبس احنا كدة فى كل حياتنا ودة غلط علشان فى الاخر بنفوق على صدمة و تيجى على دماغنا لابد ان نكون عقلانيين فى كل شىء الفرح والحزن
رائع
هذا بالظبط ما اثير بعقلى بعد حادثة أديب والمنتخب ، وتعجبت فعلا من التطرف فى الشعور ، سواء كان على جانب التأييد ام على جانب الاعتراض ...
أحسست بأننا أغبياء ، يوم صعدنا بهم فوق السحاب ويوم نزلنا به اسفل ارض ، مع انهم لم يفعلوا ما يستحقون به علو السحاب ولا دنو الأرض
هم كسبوا وخسروا
فقط ....
ربنا يهدى ...
حقا خير الأمور الوسط
********
موضوع مميز
دمت بخير
إحنا شعب عاطفى يا كريم
و دى سمة تلازمنا
و متهيألى لن تزول يوماً
احنا بنحب قوى و نزعل قوى
و نفرح قوى و كل حاجة قوى
قوى
كرة القدم لعبة حماسية قائمة على التشجيع و تجييش المشاعر و اللى بيشتغلوا فيها لازم يكونوا مهيئين لكدا إنهم يوم فوق و يوم تحت
و بعدين رد فعل حسن شحاتة و اللاعبين لم يكن احسن من رد فعل عمرو اديب
الجميع خرج عن شعوره و تجاوز
و الهدوء المطلوب
كن عاطفى كما تحب
بس وقت الازمة تتماسك
و تتوازن
و هو ما يجب عمله عموماُ مش بس ف الكورة
خالص تحياتى ليك
اوافقك الراى تمام فاتيما, شكرا لمرورك
لان عاطفتنا سابقة عقلنا وللاسف الشديد مش عقلانين كفاية لما تفوز بشىء يبقى انت بطل الابطال ولما (معلش تتغلب)يبقى مفيش فايدة وهوه احنا كده على طول مش فى موضوع الكورة بس ياكريم فى كل نواحى حياتنا لاما (بنطير فى سعادة الوهم لاما بنغوص فى شقاء الجحيم .قليل منا من يفكر بعقله قبل قلبه!
معنى كدة اننا كلنا عارفين الموضوع دة طيب ليية بقى مش نحاول نصلح نفسينا ونتعلم من اخطاءنا
عندك حق
بس المشكلة مش بس فى اننا نشارك بموضوعية
لكن فى ان الحال وصل بينا ان عدم المشاركة برد فعل زيادة عن اللزوم بقى برود او حقد او عدم فهم
يعنى بقى الاساس انك تصرخ و تتخانق و انت بتتناقش و الا تبقى مش طبيعى
فى مثل انجليزى بحبه اوى بيقول
البرميل الفاضى صوته عالى
تحياتى
انه الفراغ الذى يرى الاشياء وكأنها تُرى بالميكرسكوب
Post a Comment