Thursday, November 8, 2012

يوم فى المرور...

اللى عندة عربية لازم كل سنة او كل 3 سنين حسب ترخيص الرخصة يقضيلة يوم فى المرور للتجديد، وانت بقى وحظك ياتكون ربنا موقفلك ولاد الحلال وامورك تمشى وتتسهل دة طبعا غير انك تكون لازم بايت قبلها عشان الزحمة،وفى الحالة دية ممكت تخلص فى حدود من ساعتين لتلاتة وكدة تكون امك دعيالك وربنا راضى عنك، اما بقى لو العكس ربنا يتولاك.
الغريب ان اليوم بتاع المرور غير اى يوم تقضية فى اى مصلحة حكومية خالص هناك اختلاف و فرق شاسع لانة دائما ملىء بالاثارة والتشويق مقدرش اقول كمان متعة, الاثارة والتشويق تتمثل فى اية بقى مخالفاتك مثلا تحس وانت مستنى تعرف عليك كام اكنك مستنى نتيجة الثانوية العامة لاحسن فلوسك مش تقضى و بكدة يكون راح اليوم و مجهودك هدر.
دة غير بقى كلام الناس اللى انت طبعا بتتصاحب عليهم وانت واقف فى الطابور بتتسلوا لغاية لما يتحرك، غير طبعا الفلوس اللى بترشها فى كل شباك عشان تخلص وتنجز, من الاخر بعد لما تخلص ويكون لسة فيك نفس بتحمد ربنا و تكون سعيد طبعا كمان دة لو مش دفعت دم قلبك، بس فكرة المرور ليها مغزى انك بتتقرف و يطلع عين اهلك كلهم عشان حتى لو قالوا عليك اى مبلغ كبير تكون عايز تدفع و تخلص وفى الاخر تتف عليهم وعلى اللى شغلهم وعلى البلد اللى انت فيها. واول ماتروح وتبص للرخصة اكنك خدت شهادة الدكتوراة ولا الايزو تبتسم وترتاح وتحس انك انجزت شىء مهم جداا فى حياتك اهم من نجاحك فى عملك او حياتك عامة. حررام واللة اننا ننشغل بحجات المفروض تكون ميسرة لحياتنا وليس معوقة لها وننشغل عن الاهم. مصر هى امى

3 comments:

Nashwa said...

اهو انا متهيالى المرور اكثر حاجة فاسدة فى بلدنا ديه بكل كيانه سواء الادارى او اللي بيبقوا فى الشوارع لسه قدامنا كثير على ما نخلص من الروتين ويبقى فى تقدم شوية فى الحاجات ديه ولا تتغير حتى تحس اصلا ان الطوابير ديه بقيت سمة مميزة عندنا ان خلصت منها فى مكان تلاقيها فى غيره بس مش هى ديه مصر هو ده احنا شعب مصر

Nabil Sami said...

هههههههه حياك اللة ياصديقي , تماما يحصل عندنا في اليمن , مع تحياتي

karim said...

عزيزى نبيل شكرا لمرورك الكريم, ويا عزيزى واضح ان الوحدة العربية و الاخوة بتكون فى الاشياء السلبية فقط ههههههههههه, تحياتى